ORCHESOGRAPHIE ET TRAICTE EN FORME DE DIALOGUE, PAR LEQUEL TOUTES PERSONNES PEUVENT facilement apprendre & practiquer l'honneste exercice des dances. Par Thoinot arbeau demeurant a Lengres. Eccle. 3. Tempus plangendi, & tempus saltandi. [IMAGE] Imprimé audict Lengres par Jehan des preyz Imprimeur & Libraire, tenant sa boutique proche l'Eglise Sainct Mammes dudict Lengres. M. D. LXXXIX. A maistre Guillaume Tabourot, filz de noble homme & sage maistre Estienne Tabourot, Conseillier du Roy nostre sire & son Procureur au Baillage de Dijon, sieur des Accordz. DErnierement que j'estois a Dijon, voyant les armories De vostre noble famille, ou sont un lion de sable en un chef d'argent, & trois tambours avec un chevron d'or en champ d'azur, il me souvint qu'entre les papiers rejectez & brouillez que j'ay recuillez aultresfois soubz maistre Thoinot arbeau demeurant à Lengres, mon premier maistre, il y avoit certains discours qui parlent du tambour, que je proposay deslors vous envoyer si tost que je serois de retour audict Lengres. Est advenu que les feuilletant de plus prez j'ay treuvé qu'ilz parlent principallement des dances, & accessoirement du tambour. J'ay imprimè le tout que je vous envoye, encor que ledict sieur Arbeau m'eust deffendu de ce faire, disant telles choses qu'il avoit brouillées seullement pour tuer le temps, ne merriter l'impression, & encor moings vous estre presentées: toutesfois, j'ay estimé que prenant ceste hardiesse de le vous presenter, j'auray cêt heur de vous faire penser que j'ay bonne affection de vous servir en quelque chose de meilleur. Votre humble serviteur Jehan des preyz DIALOGUE DE LA DANCE ET MANIERE DE DANCER Par Thoinot arbeau, demeurant à Lengres CAPRIOL. MOnsieur Arbeau, je vous viens saluer, vous ne me cognoissez plus, il y à six ou sept ans que je partiz de ce lieu, de Lengres pour aller a Paris, & de lá à Orleans: je suis vostre disciple à qui vous aprinstes le compot. ARBEAU. Certes de premier front je vous ay mescogneu, parce-que vous estes devenu grand depuis ce temps là: & croy que vous avez aussy agrandy vostre esprit par vertuz, & sciences: Que vous semble de l'estude des loix? j'y ay estudié aultresfois. CAPRIOL. Je treuve que c'est un art fort beau & necessaire a la chose publique, mais je me repens qu'estant à Orleans j'ay negligé d'apprendre la civilité, de laquelle plusieurs escoliers se munissent, pour accompaigner leur scavoir, car estant de retour, je me suis treuvé ez compaignies, óu je suis demeuré tout court sans langue & sans piedz, estimé quasi une buche de bois. ARBEAU. Vostre reconfort a esté que les vieux docteurs vous ont excusé faisant ce pendant compte du scavoir que vous avez acquis. CAPRIOL. Il est ainssy, mais j'eusse bien acquis lá dexterité de dançer, aux heures que lon intermect l'estude grave, chose que me rendroit voulontiers veu d'un chacun. ARBEAU. Ce vous sera chose facile à acquerir en lisant les livres françois pour vous aguiser le beq, & aprenant l'escrime, la dance, & le jeu de paulme, pour avoir familiarité avec les hommes, & les dames. CAPRIOL. J'ay prins plaisir en l'escrime & jeu de paulme, ce qui me rend bien voulu & familier des jeusnes hommes: Mais j'ay deffault de la dance pour complaire aux damoiselles, desquelles il me semble que depend toute la reputation d'un jeusne homme à marier. ARBEAU. Vous le prenez fort bien, car naturellement, le masle & la femelle se recherchent: & n'y a chose qui plus incite l'homme à estre courtois, honneste, & faire acte genereux que l'amour: & si voulez vous marier, vous debvez croire qu'une maistresse se gaigne par la disposition & grace qui se voit en une dance, car quant à l'escrime & au jeu de paulme, les dames ny veuillent assister de craincte d'une espée rompue, ou d'un coup d'estoeuf, qui les pourroit endommager: vous souvient il pas des vers virgilians parlans de Turnus, & de la belle Lavinia fille du Roy Latinus sa maistresse. Illum turbat amor, figitque in virgine vultus: Ardet in arma magis. &c. Il y a bien plus, car les dances sont practiquées pour cognoistre si les amoureux sont sains & dispos de leurs membres, à la fin desquelles il leur est permis de baiser leurs maistresses, affin que respectivement ils puissent sentir & odorer l'un l'aultre, silz ont l'alaine souesve, & silz sentent une senteur malodorant, que l'on nomme l'espaule de mouton: de façon que de cêt endroict oultre plusieurs commoditez qui reüsissent de la dance, elle se treuve necessaire pour bien ordonner une societé. CAPRIOL. J'ay bien consideré quelquesfois ce que venez de dire, & que non sans cause, ez republiques on avoit admis les jeux & les dances, mais ce que m'en a degousté, c'est que plusieurs ont vituperé les dances, voires mesmes treuvé deshonneste de les regarder comme estant acte muliebre, indigne de la gravité de l'homme, j'ay leu que Ciceron fit reproche a Gabinius consulaire qu'il avoit dancé. Tiberius chassa de Romme les danceurs. Domitian osta du nombre des senateurs, aulcuns qui avoient dancé. Alphonse roy d'arragon blasmoit les gaulois parce qu'il les voioit delecter aux dances. Le S. prophete Moyse se courrouça voyant dancer les enfans d'Israel. ARBEAU. Pour un qui les â blasmées, une infinité d'aultres les ont louées & estimées. Le S. prophete royal david dança au devant de l'arche de Dieu: Et pour le regard du S. prphete Moyse, il ne se courrouça pas de veoir dancer, mais il estoit marry que ce fust a-lentour d'un veau d'or, qui estoit une ydololatrie: Quant a Ciceron il avoit des varices & jambes enflées, & blasmoit ce qu'il n'eust sceu faire, disant qu'il ne voioit guieres dancer ceulx qui estoient á jeun. Appius claudius ayant triumphé, les appreuva. Les indes saluent le soleil en dançant, Et ceulx qui ont voyagé ez terres neufves rapportent que les sauvages dancent quant ilz aperçoivent le soleil se monstrer sur l'orizon. Socrates apprint a dancer de Aspasia. Les saliens tresnobles prebstres de Mars dançoient en leurs sacrifices. Les choribantes en frigie. Les lacedemoniens & ceux de Crete n'alloient a l'assault contre leurs ennemis sinon en dançant. Vulcan grava sur une targue une dance comme chose tresbelle a veoir. Museus & Orpheus, voulurent que leurs hymnes qu'ilz avoient composées en l'honneur des dieux, fussent chantées avec dances. Bacchus conquesta les indes, par trois sortes de dances. En l'eglise primitive la coustume continuée jusques en nostre temps, a esté de chanter les hymnes de nostre eglise en dançant & ballant, & y est encor en plusieurs lieux observée. Pollux & Castor, aprindrent les Cariens à dancer. Neoptolemus filz d'Achiles enseigna une dance appellée la pirrichie a ceulx de crete pour s'en aider en la guerre. Epaminundas en usoit fort dextrement, au choq d'une bataille, affin que tous ensemble marchassent contre l'ennemy. Xenophon rapporte que lon fit dances & mascarades pour recepvoir les capitaines de Cirus. Les Roys & princes, commandent dances & mascarades, pour festoier, recepvoir, & faire recueuil joyeux, aux seigneurs estrangiers. Nous practiquons telles resjouissances aux jours de la celebration des nopces, & ez solemnités des festes de nostre Eglise, encor que les reformez abhorrent telles choses mais ilz meriteroient d'y estre traictez de quelque gigot de bouc mis en paste sans lard. CAPRIOL. Vous me mectez en volunté d'y apprendre & me faictes repentir que je n'y ay appliqué quelques heures gaillardes, car on peult prendre plaisir honneste sans se maculer de luxure & mauvaises affections. Il me souvient que le poëte mect les danceurs entre les bien heureux, disant en son sixieme des Æneides, Pars pedibus plaudunt choreas & carmina dicunt. ARBEAU. Vous pouviez encor alleguer, que nostre seigneur (en Sainct Mathieu unziesme & Sainct Luc 7) reprochoit aux Pharisiens, rebours & mal affectionnez, Nous avons chanté & flutté, & vous n'avez pas dancé. Je vous diray, il vous fault faire comme fit Demetrius, lequel ayant blasmé les dances, aprés qu'il eut veu dancer une mascarade en laquelle on representoit l'adultere de Mars & Venus, confessa qu'il n'y avoit si belle chose au monde. Vous pouvez en peu de temps recouvrer ceste perte considéré mesmement que vous estes musicien, & que la dance est dependant de la musique & modulations d'icelle, qui est un des sept arts liberaux. CAPRIOL. Je vous prie donq monsieur Arbeau, m'en apprendre quelque chose car je scay bien que vous estes musicien & qu'avez en vostre jeunesse receu la reputation d'stre bon danceur, & fort dextre a mil gaillardises ARBEAU. Dance vient de dancer, que lon dit en latin Saltare : Dancer c'est à dire saulter, saulteloter, caroler, baler, treper, trepiner, mouvoir & remuer les pieds, mains, & corps de certaines cadances, mesures, & mouvementz, consistans en saultz, pliement de corps, divarications, claudications, ingeniculations, elevations, jactations de pieds, permutations & aultres contenances desquelles Atheneus, Celius, Scaliger, & aultres font mention: aulcunefois on y adjouxte les masques pour monstrer les gestes d'un personnage que lon veult representer. Lucian en à faict un traicté, ou vous pourrez veoir ce qu'il en dit plus au long: Julius pollux en faict semblablement un chappitre bien ample. CAPRIOL. Je pense avoir quelquesfois faict lecture de ces aultheurs, & aultres semblables: Et si j'ay bonne souvenance ilz recitent trois sortes de dances, une grave, nommée Emmelie: une gaye, qu'ils nomment Cordax: une aultre nommée Siccinnis, entremeslée de gravité & gaieté: ilz parlent aussi de la dance nommeé Pirrichie & plusieurs aultres sortes, comme il me souvient aussi qu'ilz font mention de plusieurs sortes de mascarades, mesmement d'une qu'ils appellóient la Tricorie, composée de trois choeurs & assemblées de vieulx, d'adolescentz: & de jeusnes enfans, qui chantoient, nous avons esté, nous sommes, & nous serons. Je comprends bien tout cela en generale notion, mais je vouldrois estre apris de quelz piedz & mouvementz cela se faisoit, aprenez le moy s'il vous plait. ARBEAU. Anthoyne arena provençal à escript ce que vous demandez en vers macaronées. CAPRIOL. En ces vers que vous dictes il a parlé du mouvement qu'il fault tenir aux bransles, & basses-dances seullement, & des contenances que doibvent observer les danceurs, mais la necessité des vers la rendu obscur, occasion de-quoy, je vous prie m'en eclarcir davantage. ARBEAU. Quant aux dances anciennes, je n'en scaurois que dire, car l'injure du temps ou la paresse des hommes ou la difficulté de les descripre a esté cause de nous en oster la cognoissance, & aussi vous n'en debvez avoir soucy, parce que telles façons de dancer sont hors de practique, voires nous avons veu du temps de noz peres, aultres dances que celles de present lesquelles en sont de mesmes tant sont les hommes amateurs de nouveaultez: il est vray que nous pouvons comparer lemmelie a noz pavanes, & bassesdances: le cordax, aux gaillardes, tordions, voltes, corantes, gavottes, bransles de champaigne & de bourgoigne, bransles gays & bransles couppez. Le Siccinnis aux bransles doubles & bransles simples La pirrichie a la dance que nous appellons bouffons ou matachins. CAPRIOL. Je prevoy donq que nostre posterité sera ignorante de toutes nos nouvelles dances que venez de nommer, par les mesmes causes qui nous ont osté la cognoissance de celles de nos anciens. ARBEAU. Il le fault ainsi conjecturer. CAPRIOL. Monsieur arbeau ne permectez cela de vostre pouvoir puis que y pouvez remedier: mectez en quelque chose par escript cela sera cause que j'apprendray ceste civilité, & en l'escrivant, il vous semblera rajeunir & avoir les mesmes compaignies qu'aviez en vostre jeunesse, & prendrez aultant dexercice d'esprit & du corps aussi, car difficillement vous abstiendrez vous de remuer les membres, pour m'enseigner les mouvements y necessaires: Vray est que vostre methode d'escripte est telle, qu'en vostre absence, sur vos theoriques et preceptes, un disciple pourra seul en sa chambre apprendre vos enseignements. Et en premier lieu je vous veulx prier, me dire en quelle estime la pluralité des gens d'honneur tient la dance. ARBEAU. La dance ou saltation est un art plaisant & proffitable, qui rend & conserve la santé, convenable aux jeusnes, aggreable aux vieux, & bien seant a tous, pourveu qu'on en use modestement en temps & lieu, sans affectation vicieuse: je dis en temps & lieu, parce qu'elle apporteroit mespris a celluy qui comme un pillier de salle y seroit trop assidu. Vous scavés que dis l'ecclesiaste. Cum muliere saltatrice non sis assiduus. Les enfans des senateurs romains au sortir des escolles alloient apprendre à dancer. Homere tesmoigne la dance estre une partie & appendice des banquets, tellement que personne ne se peult vanter d'avoir accomply un brave festin, sil n'y à appliqué la dance laquelle est comme un corps entier accompaigné de son bel esprit, si on y joinct les masquarades. Quant on recitoit dedans les theatres anciennement les tragoedies, comoedies, & bergeries, les dances & gesticulations n'y estoient oubliées, & en la partie desdicts theatres qui pour ceste occasion estoit appellée Orchestre: que nous pourrions appeller en nostre langue françoise, le dançoir. CAPRIOL. Puis que c'est un art, il depend donq de l'un des sept arts liberaulx. ARBEAU. Je vous ay ja dit, quelle depend de la musique & modulations d'icelle: car sans la vertu rithmique, la dance seroit obscure & confuse: daultant qu'il fault que les gestes des membres accompaignent les cadances des instruments musicaulx, & ne fault pas que le pied parle d'un, & l'instrument daultre. Mais principallement tous les doctes tiennent que la dance est une espece de Rhetorique muette, par laquelle lO'rateur peult par ses mouvements, sans parler un seul mot, se faire entendre, & persuader aux spectateurs, quil est gaillard digne d'estre loué, aymé, & chery. N'est-ce pas à vostre advis une oraison qu'il faict pour soy-mesme, par ses pieds propres, en gendre demonstratif? Ne dit il pas tacitement à sa maistresse (qui le regarde dançer honnestement & de bonne grace) aymés moy, desirés moy? Et quant les masquarades y sont joinctes, elle ha efficace grande de mouvoir les affections, tantost à cholere, tantost à pitie & commiseration, tantost à la hayne, tantost à l'amour. Comme nous lisons de la fille d'Herodias, laquelle obtint ce quelle demanda au Roy Herode Antipe, aprés quelle eut dancé au banquet magnifique qu'il fit aux princes de son royaulme, à mesme jour qu'il estoit né Comme aussi Roscius le faisoit bien paroistre à Ciceron, quant il adjançoit les gestes & actions muettes de telle façon, qu'au jugement de ceulx qui en estoient arbitres, il mouvoit aultant ou plus les spectateurs, que Ciceron eut peu faire par ses elocutions oratoires. CAPRIOL. Roscius estoit un histrion, & me semble que nos loix tiennent telles gens notés d'infamie. ARBEAU. Roscius estoit tenu & reputé (par messieurs du senat, & par tous les romains qui assistoient ordinairement au theatre pour le veoir) fort honneste & habille homme: tellement que quant on voulloit alleguer quelque artisant parfaict, on disoit que c'estoit un Roscius en son art. Ciceron plaida pour luy en une cause qu'il avoit contre Fannius, & obtint victoire par la faveur de tout le senat, qui l'aimoit, prisoit, & honoroit. Ceulx veritablement lesquels pour gaigner argent, admettent un chacun indifferemment à veoir leurs jeux & farces, sont comptez entre les infames: mais la loy n'y à jamais compris ceulx qui s'exhibent gratuitement, pour se donner du plaisir, & recreer les Roys, les princes, les seigneurs, les habitans d'une ville, ou quelques compaignies particulieres: soit par actions de tragoedies, comoedies, & bergeries, representées a visage decouvert ou par dances qu'on faict avec musiques, ou aultres vestures & portementz gratieux, par maniere de resjouissance: & ainsi le resoult l'Empereur en l'unzieme du Code, au chappitre des Jeux publiques. CAPRIOL. Je croy fermement qu'il se doibt ainsi entendre. Ne tardés donc plus davantage à exaulcer ma requeste, & me dedvisés par le menu, comme se font les mouvements des dances, affin que je m'y exerce: & qu'il ne me soit reproché ce que disoit Lucian à Craton, que l'aye un coeur de porc, & une teste d'asne. ARBEAU. Lucian n'adresse ce reproche, à ceulx qui ne veuillent, ou bien qui veuillent, mais ne peuvent apprendre cêt art, mais il attaque ceulx qui le veuillent blasmer & regetter, comme action mauvaise, non considerans, qu'il en est de deux sortes: les unes servent à la guerre, force, & deffence de la republique, les aultres sont recreatives & ont avec soy une vertu d'attirer les coeurs & concilier l'amour, & sont un præparatif & cautelle (comme je vous ay ja dit) pour cognoistre si les personnes sont point maleficiées de goutes ou loups és jambes, & si elles ont bonne contenauce & modeste. Nous lisons que Clistenes ayant veu dançer & morguer impudemment Hypoclide, luy refusa sa fille en mariage disant qu'il avoit dedancé les nopces. CAPRIOL. Dieu mercy, je n'ay point telles infirmités & n'ay qu'une soeur qui est aagée de douze ans que j'y feray apprendre quant vous m'aurés enseigne. ARBEAU. Galien dit en son livre du regime de la santé, que toute chose naturellement desire de se mouvoir; & que lon se doibt exercer par mouvements doulx & temperés comme est la dance, que ceulx d'Ionie iuventérent à cêt effect: pour ceste occasion elle sert grandement à la santé, mesmement des jeusnes filles, lesquelles estans ordinairement sedentaires, & ententives à leur lanifice, broderies, & ouvrages desguille, font amas de plusieurs maulvaises humeurs, & ont besoing de les faire exhaler par quelque exercice temperé. CAPRIOL. La dance leur est un exercice propre car elles n'ont pas liberté de se promener, & aller ça & la dehors & dedans les villes, ainsi que nous póuvons faire sans reprehension, tellement que n'en avons besoing comme elles: neantmoings, je suis desireux d'apprendre cêt art si ancien & si honneste & profitable. ARBEAU. Pour vous complaire, je vous en diray ce que j'en scay encore qu'il me sera mal seant (en l'aage de soixante neuf ans ou je suis) de traicter & practiquer telle matiere. Parlons donc premierement de la dance guerriere, puis nous parlerons de la recreative. Les instruments servant a la marche guerriere, sont les buccins & trompettes, litues & clerons cors & cornets, tibies, fifres, arigots, tambours, & aultres semblables, mesmement lesdicts tambours. Le tambour des perses (duquel usent aulcungs allemands le portans à l'arçon de la selle) est composé d'une demysphere de cuyvre bouchée d'un fort parchemin, d'environ deux pieds & demy de diametre: & faict bruit comme d'un tonnerre, quant ladicte peau est touchée avec batons. Le tambour duquel usent les françois [assés cogneu par un chacun] est de bois cave long d'environ deux pieds & demy, estoupé d'un cousté & d'aultre de peaulx de parchemin, arrestées avec deux cercles denviron deux pieds & demy de diametre, bandées avec cordeaux affin qu'elles soient plus roides: & faict [comme vous pouvez avoir ouy plusieurs fois] un grand bruit, quant lesdictes peaulx sont frappées avec deux battons que celluy qui les bat tient en ses mains. La figure en est assés cogneue à un chacun, toutesfois je la mettray icy puis que nous en sommes en propos. [IMAGE] CAPRIOL. Vous mectés des petits liens & boucles, à chacune reflexion des cordeaux du tambour. ARBEAU. C'est pour bander les peaulx quant on le veut batre, en approchant lesdicts liens prés du meillieu: & pour les desbander quant on le veut laisser à repos en approchant lesdicts liens des cercles & bords, Je ne scay si les enfans d'Israel usoient de tambour à un fonds, comme on faisoit à Romme au sacrifice de la mere des dieux: mais le quinzieme chappitre d'Exode rapporte, que Marie soeur de Moyse & d'Aaron, battoit fort bien le tambour. Virgile au sixieme de l'Æneide parlant de Misenus, trompette d'Hector, puis d'Ænée, dit ces mots, Quo non præstantior alter Æere ciere viros, martemque accendere cantu. Et peu apprés. Et lituo pugnas insignis obibat, et hasta. Le bruict de tous lesdicts instruments, sert de signes & advertissements aux soldats, pour desloger, marcher, se retirer: & à la rencontre de l'ennemy leur donne coeur, hardiesse, & courage d'assaillir, & se deffendre virilement & vigoureusement. Or pourroient les gens de guerres marcher confusément & sans ordre cause qu'ils seroient en peril d'estre renversés & deffaicts, pourquoy nosdicts françois, ont advisé de faire marcher les rencs et jougs des escouades avec certaines mesures. CAPRIOL. Comment cela. ARBEAU. Vous estes musicien, & scavés bien que c'est des mesures, du temps, les unes sont binaires, les aultres sont ternaires, & que de toutes ces deux sortes de temps il en y à de pesantes, de moyennes, & de concitées. CAPRIOL. Cela est vray. ARBEAU. Vous me confesserés que si trois hommes se promenoient & marchoient ensemble, & chacun deulx vouloit aller à part selon l'une des trois diversités ils ne s'accorderoient pas: car il fauldroit que tous trois marchassent, ou vittement, ou bellement, ou mediocrement. CAPRIOL. Il n'y à point de doubte. ARBEAU. C'est pourquoy, en la marche de la guerre, le françois à faict servir le tambour pour tenir la mesure, suivant laquelle les soldats doibvent marcher. combien que la plus grand part des soldats n'y sont guieres bien exercés, non plus qu'en tout le reste de l'art militaire, mais pour cela je ne laisseray d'en escripre les modes. La mesure & battement du tambour, contient huict minimes blanches, desquelles les cinq premieres sont battues & frappées scavoir les quatre premieres chacune d'un coup de baston, seul & la cinquieme des deux battons tout ensemble, & les trois aultres sont teues & retenues, sans estre frappées. [PARTITION] Pendant le son & battement de ces cinq blanches et trois souspirs le soldat faict une passée, c'est a dire, il passe & extend ses deux jambes tellement que sur la premiere notte, il pose & assiet son pied gaulche, & durant les trois aultres nottes, il leve le pied droict, pour le poser & asseoir sur la cinquieme notte, & durant les trois souspirs qui equipolent a trois nottes, il releve son pied gaulche pour recommencer une aultre passée comme auparavant: Et ainsi consequemment tant que le chemin dure en sorte qu'en deux mil cinq cents battements de tambour le soldat marche la longueur d'une lieue. CAPRIOL. Pourquoy faictes vous marcher le pied gauche le premier? ARBEAU. Parce que la plus grand part des hommes sont droictiers, & que le pied gaulche est le plus foible, & s'il advenoit que le pied gaulche vacilast par quelque inconvenient, le pied droict seroit incontinent prest pour le soulager. CAPRIOL. Il me semble qu'une passée, en latin passus est dicte de l'expansion des deux bras, & non des deux pieds, ARBEAU. Regardés bien & treuverés en le mesurant que la passée des deux pieds est de mesme longueur, que l'expansion ou extension des deux bras, que les geometriens estiment estre de cinq pieds CAPRIOL. Vous forcomptés vous point, de dire qu'il fault pour une lieue marcher deux mil cinq cents battements de tambour car la lieue ne tient que deux mil passées qui font deux mil battements de tambour à prendre comme vous dictes, à chacun battement de tambour une passée. ARBEAU. Une seule passées, tient veritablement cinq pieds, & en fault deux mil pour la lieue, mais quant on faict soubs le tambour plusieurs passées l'une après l'aultre, chacune passées n'a que quatre pieds, d'aultant que le pied de la cadance de la premiere passée sert de position à la deuxieme & ainsi de passée en passée tellement que lesdictes passées ne contiennent chacune que quatre pieds, & par ainsi fault pour une lieue deux mil cinq cents passées, qui font deux mil longueurs de cinq pieds geometriques. CAPRIOL. Je le comprends fort bien maintenant. ARBEAU. Oultre ce vous debvés penser que quant les battements du tambour sont diversiffiés, ils en sont plus aggreables, & pour ceste cause ceulx qui le battent mectent quelquesfois les cinq minimes blanches & les trois souspirs comme dessus à esté notté, quelquesfois en lieu des blanches, ils mectent deux minimes noires ou quatre crochues, comme il leur vient en phantasie, mais ce pendant il fault que la cinquieme notte soit entiere blanche, si ce n'est qu'ils veuillent continuer deux ou trois ou plusieurs battements, car lors il ne font point les trois souspirs fors au dernier. CAPRIOL. J'entends quasi cecy, mais je vouldrois bien avoir exemple de ces diversités. ARBEAU. Les diversités se font par les entremeslements des blanches, noires, & crochues. CAPRIOL. Donnés m'en veoir une liste, ou tabulature. ARBEAU. Vous scavés bien qu'une minime blanche emporte deux noires: & qu'une minime noire emporte deux crochues: ainsi pendant le temps d'une blanche, on en peult battre deux noires ou quatre crochues: & pour le mieulx remarquer appellons le son d'une minime blanche qui se faict par un coup de baston appellons le dis je Tan, ou Plan. Et le son de deux minimes noires, qui se faict par deux coups de bastons appellons le Tere, & le son de 4 crochues qui se faict par 4 coups de bastons Fre. Entremeslons puis aprés ces diversités les unes avec les aultres, & nous en treuverons de maintes sortes desquelles voicy une tabulature, en laquelle vous choisirés les sortes qui vous plairont le mieulx. Tabulature contenant toutes les diversités des battements du tambour. La premiere façon, est composée seullement de cinq Tan. comme devant à esté notté. [PARTITION] Les aultres battements sont composés par les meslanges de Tan avec Tere, Dudict Tan avec Fre, & des trois ensemble Tan, Tere, & Fre. Et premierement meslange de quatre Tan, & un Tere, se peult faire en quatre sortes. [PARTITION] Meslange de trois Tan, & deux tere. [PARTITION] Meslange de deux Tan, & trois Teré. [PARTITION] Aultre meslange de quatre Tere & un Tan, laquelle ne se peult diversiffier aultrement, parce qu'il fault par necessité que le Tan soit à la fin pour faire la cadance. [PARTITION] Meslange de quatre Tan & un Fre. [PARTITION] Meslange de trois Tan & deux Fre, lequel reçoit six diversités ainsi qui sensuit. [PARTITION] Meslange de deux Tan & trois Fre lequel on peult diversiffier en quatre sortes. [PARTITION] Aultre batement composé de quatre Fre, & un Tan lequel ne se peult aultrement diversiffier. [PARTITION] Meslange de trois Tere & un Fre, avec le Tan final. [PARTITION] CAPRIOL. Je croy que le tambour ne scauroit faire aultres diversités de battemens que ceulx qu'avés declaré cy dessus. ARBEAU. La deduction vous en à esté ennuyeuse, mais il en y à encor d'aultres que j'acheveray affin de ne laisser imparfaict ce que j'en ay commencé. Meslange de deux Tere, & deux Fre, avec le Tan final. [PARTITION] Meslange d'un Tere & trois Fre, avec le Tan final, lequel on peult diversiffier en quatre sortes aprés lesquelles je vous deduiray le reste des aultres meslanges. [PARTITION] Meslange de trois Tan, un Tere & un Fre, de laquelle sont faictes et composées, les diversités que sensuyvent en nombre de douze. [PARTITION] Meslange de deux Tan, deux Tere, & un Fre, de laquelle sont faictes & composées les diversitez qui s'ensuyvent, & sont en nombre de douze. [PARTITION] Meslange de deux Tan un tere & deux Fre de laquelle sont faictes & composées les diversités qui s'ensuyvent & sont en nombre de huict. [PARTITION] Entre toutes les diversitez nombrees cy dessus, un tambour pourra choisir celles qui luy sembleront estre plus aggreables, & mieulx sonnantes aux aureilles. CAPRIOL. Pourquoy y mect on ces souspirs? Que ne faict le tambour pour chacune passee les huict minimes blanches? quatre pour le pied gauche, & quatre pour le pied droict. ARBEAU. Si le tambour n'usoit point de souspirs, les marches des soldats pourroient tumber en confusion car [comme je vous ay dit] lassiette du pied gauche doibt estre sur la premiere note, & lassiete du pied droit sur la cinquiéme, & si les huict nottes estoient toutes touchees, un soldat pourroit faire les assiettes de ses pieds sur aultres nottes que sur la premiere & cinquiéme: Ce qui n'advient en y colloquant des repos & souspirs, car battant ainsi il entend bien ladicte premiere notte, & ladicte cinquiéme. CAPRIOL. Ne peult on faire des souspirs és battemens du tambour aultres qu'apres la cinquiéme notte? ARBEAU. Le tambour des Suysses faict un souspir aprez la troisiéme notte, & les trois souspirs a la fin: mais tout revient à un car les assiettes des pieds se font tousjours sur la premiere & cinquiéme notte. [PARTITION] [IMAGE] CAPRIOL. Ces modes de marcher au son du tambour sont belles, quant elles sont bien observees. ARBEAU. Elles se peuvent faire aultrement par ladicte mesure binaire en mettant seulement ung souspir aprez les cinq nottes minimes: & en ce cas le soldat pòse son pied gauche sur la premiere notte, puis son pied droit sur la troisieme notte, puis encor son pied gaulche sur la cinquiéme. Et au battement qui vient aprez, il faict lassiette de son pied droit sur la premiere notte, puis de son pied gaulche sur la troisieme notte, & encor de son pied droit sur la cinquieme, & ainsi continuant tant que le chemin dure. CAPRIOL. A ce compte chacun battement de tambour emporteroit plus grand espace de chemin qu'il ne feroit en marchant par passees. ARBEAU. C'est chose certaine: Car le premier battement, emporteroit sept pieds, & tous les aultres suyvants six pieds seullement, & par ce moyen le soldat chemineroit une lieue en mil six cents soixante six battements de tambour ou environ. Il seroit possible aussi de battre lesdictes cinq minimes blanches & un souspir, & les marcher & passer par mesure ternaire. [PARTITION] Soubz ladicte mesure ternaire le soldat poseroit lassiette de son pied gauche sur la premiere notte & puis lassiette de son pied droict, sur la quatrieme notte, & ainsi consequemment. CAPRIOL. Ceste mesure ternaire est bien gentile, les passees y sont semblables comme au binaire, & si ny a qu'ung souspir & repos. ARBEAU. Quant les guerriers approchent l'ennemy, ils se serrent plus estroictement, & doibvent bien observer leurs màrches comme je vous ay dit en asseant le gaulche sur la premiere nótte. CAPRIOL. Si le soldat asseoit le pied droict sur ladicte premiere notte, tout ne reviendroit-il pas a ung? ARBEAU. Non pas bonnement, par ce que [comme il est a presupposer] la plus part des soldats estants droictiers & marchans le pied gauche le premier, si aulcungs commenceoient par le droict & finissoient par le gauche, ils se hurteroient les espaules lors qu'ils sont serrez, & s'empescheroient, par ce que nous gettons l'espaule du cousté de lassiette du pied. Si donc un soldat commenceoit du pied gauche, son espaule yroit a gauche, & lespaule de celuy qui commenceroit du pied droit iroit a droit, & se viendroit à heurter. Ce que n'advient és marches semblables & de mesme pied ou les espaules vont undoyants d'ung cousté puis d'aultre sans se heurter ou empescher: ce que vous experimenterez facilement en vous promenant avec quelcung. C'est pourquoy le tambour faict aucunes fois une continuation de plusieurs battements joincts ensemble, affin que s'il y a de la confusion par transmutation de marches, les soldats la puissent reparer, & qu'ils se remettent tous aisément sur lassiette gauche, aprés qu'ils ont ouy le repos du souspir ou de trois souspirs: Et cela sert grandement à faire les evolutions. CAPRIOL. Qu'est-ce à dire evolutions, ARBEAU. Ce n'est pas nostre intention de traicter icy de l'art militaire: Si vous voulez sçavoir que c'est evolution, voiez le livre que Ællanus a escript à l'Empereur Adrian. Je vous diray seulement: qu'oultre les marches saltations & dances guerrieres cy dessus declarees: le tambour use d'une continuation de battements plus legiers & concitez par minimes noires, y entremeslant des coups de battons, frappez rudement, lesquels font un son comme si cestaient coups d'arquebuses, & ce quand les soldats approchent l'ennemy de prez: Et lors qu'ils se veullent joindre contre le bataillon de l'ennemy, les soldats se serrent les uns contre les autres, comme s'ils estoient tous d'une piece, & couchent leurs picques & sarisses, faisans d'icelles un rampart fort espais, & difficile à forcer & rompre. [IMAGE] Cependant le tambour sonne deux minimes noires continuees, qui font la mesure binaire legiere, du pied que les Poëtes appellent Pirrichie, & s'avanceans, tenans tousjours le pied gauche devant, & en font lassiette sur la premiere notte du Pirrichie. Et sur la deuxieme notte dudict Pirrichie, ils font lassiette du pied droict dernier, & proche dudit pied gauche, comme pour s'en servir d'Arc bouttant. Et ainsi saultelotans & danceans, commencent le combat, comme si le tambour vouloit dire: [PARTITION] CAPRIOL. Je marcherois & dancerois maintenant fort bien [ce me semble] les passees militaires soubz les battements & mesures. Mais pourquoy est ce tambour accompaigné d'un ou deux flutteurs? ARBEAU. Nous appellons le fifre une petite flutte traverse à six trouz, de laquelle usent les Allemands & Suysses, & d'aultant qu'elle est percee bien estroictement de la grosseur d'un boulet de pistolet, elle rend un son agu: aulcungs usent en lieu de fifre dudict flajol & fluttot nommé arigot, lequel selon sa petitesse à plus ou moings de trouz, les mieulx faits ont quatre trouz devant & deux derriere, & est leur son fort esclattant, & pourroit on les appeller petites Tibies, par ce que premierement on les faisoit de Tibies & jambes de Grues. Les joueurs desdicts tambour & fifre sont appellez du nom de leurs instruments, quant nous disons de deux soldats, que l'ung est le tambour & l'aultre le fifre de quelque Capitaine. CAPRIOL. Y à-il certaine façon pour jouer du fifre ou arigot? ARBEAU. Ceulx qui en sonnent jouent à plaisir, & leur suffit de tumber en cadance avec le son du tambour, toutesfois nous lisons que le ton Phrigien que les musiciens appellent le troisiesme ton, incite naturellement à colere, & d'iceluy usoient les Ludians allans en la guerre. L'hystoire rapporte que quand Thimothee en jouoit sur la Tibie, aussi tost Alexandre le Grand se levoit comme furieux & enragé de combatre. Bacchus grand Capitayne nommé Dionisius apprint ses soldats environnez des femmes de son camp à dancer & faire marches guerrieres au son du tambour & de la Tibie Phrigienne, & par ce moyen subjuga les Indois, car les Indois marchoient en foule & confusion avec cryz & hurlements, & partant furent perturbez & facilement mis en vaude-routte & vaincuz. CAPRIOL. Donnez moy une tabulature du fifre ou arigot comme vous m'avez donné du tambour. ARBEAU. Je vous ay dit que la musique du fifre ou arigot se compose au plaisir du joueur. Toutesfois je vous en donneray icy ung petit extraict que j'ay retiré de M. Ysaac Huguet Organiste, lequel l'extend sur son Espinette depuis C sol fa ut, ou B fa B my, jusques en E la: Et pour Basse-contre en lieu de tambour, il tient du poulce de la main gauche C fa ut, & du petit doigt l'octave en bas, lesquelz il touche par rechange, sçavoir l'octave en bas sur la premiere minime blanche, & C fa ut sur la cinquieme, tenant tousjours ferme le doigt demonstrant sur le G ut, qui faict l'accord parfaict d'une quinte avec ladicte octave en bas, & d'une quarte contre ledict C fa ut. CAPRIOL. Il me semble [sauf vostre correction] que par les reigles de musique, ceste quarte n'est pas recevable pour servir en la Basse-contre. ARBEAU. Vous le prenez fort bien, mais cela s'entend quand on veut faire chanter quatre partie avec les voix: mais en ce cas icy, il est question du son du tambour, lequel sert de Basse contre, & parce qu'il n'a poinct de phtongue & consistance, il est comme je vous ay dit à tous accords, & n'est pas mal faict que l'Espinette le represente en ces discords accordants, & avant que de vous en donner la Tabulature, vous vous sonviendrez qu'il y a deux manieres de flutter, l'une en tetant, l'aultre en rollant, au premier la langue du Joueur faict té té té, ou tere tere tere, & au second jeu rollé, la langue du Joueur faict relé relé relé: Je vous adverty de cecy, parce que la Tabulature que je vous veulx escripre doit estre fluttee en jeu tété, & non pas en jeu rollé. CAPRIOL. Pour quelle raison la doit on plustost tétér, que rollér? ARBEAU. Pour ce que la pronunciation du jeu teté est plus aigre & rude, & consequemment plus convenable au son guerrier, que n'est celle du jeu rollé. Tabulature du Fifre, ou Arigot du troisiesme ton. [PARTITION] CAPRIOL. Je suis bien aise d'avoir ceste tabulature, j'ay un petit arigot je m'essairay d'y jouer le contenu en icelle. ARBEAU. Vous pourrés ampliffier ceste musique, à vostre plaisir & phantasie. Et si d'aventure vous presuposés que le tambour sonne par mesure ternaire, laquelle consiste de cinq minimes blanches & un souspir, vous vous pourrés ayder de la musique cy dessus en retranchant deux minimes blanches sur chacun battement tantost sur la fin des cadances, tantost sur le commencement, tantost sur le meillieu, tellement que la liaison n'en soit point corrompue. CAPRIOL. Ceulx qui ont cognoissance de la musique, le peuvent faire facilement. ARBEAU. Je vous en veulx donner une en mesure ternaire, dont vous userez sans avoir la peine de retrancher la susdicte si vous ne voulez, laquelle vous pourrez aussi amplifier tant qu'il vous plaira. CAPRIOL. Puis qu'il vous plaist prendre ceste peine, vous m'obligerez. Tabulature pour jouer du Fifre ou Arigot en mesure ternaire. [PARTITION] CAPRIOL. Je n'ay aulcune affection d'aller en la guerre, toutesfois ces preceptes que m'avez donnez de la dance guerriere me pourront servir quant nous ferons quelque monstre en armes par la ville de Lengres: Mais tandiz passez oultre, & m'enseignez que cest de la dance recreative. ARBEAU. Il vous fault premierement premectre qu'à la similitude du tambour, duquel nous avons parlé cy dessus, on en a faict ung petit que l'on appelle tabourin à main, long d'environ deux petits piedz & un pied de diametre, que Ysidorus appelle moityé de Simphonie, sur les fonds & peaulx duquel on colloque des fillets retors, en lieu qu'au grand tambour on y mect sur le diametre de l'ung des fonds seulement un double cordeau. CAPRIOL. De quoy servent ces fillets retors? ARBEAU. Ilz sont cause que quant le tabourin est battu d'ung batonnet, ou avec les doigts, le son dudict tabourin est stridule & tremblotant. CAPRIOL. Symphonie, cest à dire consonance, & non pas un tabourin. ARBEAU. A la verité, ce mot grec de Symphonia est à dire consonance, & de ce mot sont appellez les Musiciens Symphoniaques: Mais il n'est pas impertinent, que le tabourin ait receu ceste denomination d'estre comprins soubz le nom de Symphonie, parce qu'il est accompaigné ordinairement d'ung ou plusieurs aultres Instruments musicaux, avec lesquels il convient, & leur donne grace servant de Base & Disdiapason à tous accords, c'est vraysemblablement, celuy duquel on usoit avec l'instrument appellé Chorus, pour rendre louange à Dieu en resjoyssance, & dont parle le S. Prophete royal, quand il dit: Laudate Dominum in tympano & choro: En Sainct Luc 15 le filz aisné du pere de famille fut indigné quand il sceut que pour la bien venue de son frere, l'on faisoit grand chere avec le veau gras & la Symphonie & le Chorus. Daniel recite en son 3. Chap. que Nabuchodonosor fit crier que chacun adorast sa statue, si tost que l'on orroit jouer la flutte le haubois, la sacqueboutte, la harpe, le psalterion, la Symphonie & autres instruments musicaux. CAPRIOL. J'eusse interpreté ce mot de Chorus pour une compagnie de danceurs. ARBEAU. Jay veu la figure dudict instrument Chorus en un livre ou tous les Instruments sont descripts, & estoit joinct avec la Symphonie ou tabourin, comme maintenant on y joinct la flutte ou grand Tibie. Les Basques & Bearnois usent d'ung aultre tabourin qu'ils tiennent surpendu à la main gauche & le touchent avec les doigts de la main droicte, le bois est seulement creux de demypied, & les peaulx d'un petit pied de diametre, & est environné de sonnettes & petites pieces de cuyvre, rendants un bruict aggreable & non affreux, comme celuy grand que descript Suidas remply de clochettes, duquel usoient ceulx des Indes en leurs batailles. Quant à nostre tabourin, nous ny mettons point de sonnettes, & l'accompagnons ordinairement d'une longue flutte ou grand tibie: Et de ladicte flutte le joueur chante toutes chansons que bon luy semble, la tenant avec la main du bras gauche, duquel il soustient le tabourin. [IMAGE] CAPRIOL. Est-il possible qu'il puisse faire sonner une chanson avec sa main gauche seulle: Je ne le puis croire, car je suis assez empesché de treuver tant de voix diverses avec mes deux mains sur une flutte à neuf trouz, & aussi il me semble impossible de jouer & la tenir d'une mesme main. ARBEAU. Le bout pres la lumiere est soustenu dans la bouche du Joueur, & le bout d'embas est soustenu entre le doigt auriculaire & le doig medicin, & oultre ce afin qu'elle ne coule hors la main du Joueur, il y a une esguillette au bas de ladicte flutte ou se met ledict medicin pour l'angaiger & la soustenir, & n'a que trois pertuis, deux devant, & ung derrier, & est admirablement inventee, car du doig demonstrant & du doig du meillieu qui touchent sur les deux pertuis devant & du poulce qui touche sur le pertuis derrier, tous les tons & voix de la game s'y treuvent facilement. CAPRIOL. C'est donc ung secret que j'apprendrois voluntiers en passant chemin, puis je vous remettray en propos. ARBEAU. Vous debvez sçavoir que les tubes ou tuyaulx qui sont haults & longs, & ont la lumiere basse & estroicte comme est la flutte de question, saultent facilement & naturellement à leur quinte quant ilz sont soufflez un peu plus fort: Et si on les souffle encor plus fort, ils montent à l'octave: De façon que quant la longue flutte est soufflee doulcement & tous les pertuis sont bouchez, supposé qu'elle sonne G ut, si on ouvre le premier pertuis que bouche le doigt mediant, elle sonnera A re, si on ouvre encor le deuxieme pertuis que bouche l'index, elle sonnera B my, & si on ouvre le troisieme pertuis qui est derrier que bouche le poulce, elle sonnera C fa ut: Aprez cela, le tout estant bien bouché, soufflant un peu plus fort, elle saulte à la quinte & sonne D sol re: Avec ce mesme vent, si le mediant est levé, elle sonnera E la my, & le demonstrant levé aprez, elle sonnera F fa ut: Ce faict, en levant le poulce, elle sonnera G sol re ut, & ainsi continuant & levant les doigs, & donnant le vent fort comme il appartient, on y treuve plusieurs gradations de voix. CAPRIOL. Vous faictes ceste octave de G sol re ut sur l'ouverture du poulce, donc en fermant tout, ce debvroit estre A la mi re. ARBEAU. Le tout bouché sonne l'octave aussi, a cause de la naturelle disposition de ceste sorte de flutte, qui saulte toute bouchée à la quinte, puis à l'octave. CAPRIOL. Quant on dict en Therence, que la comoedie de l'Andrie fut jouée soubs les Tibies non pareilles de Claudius, Se doibt il entendre de ces fluttes dont vous parlés? ARBEAU. Certes je le croy ainsi, car par les marbres antiques il se treuve qu'un mesme personnage jouoit de deux fluttes tout ensemble desquelles l'une estoit plus grande & sonnoit plus grave, l'aultre estoit plus courte, & sonnoit plus aigre. La plus grande estoit à la main gaulche: & la plus courte, a la main droicte. Et les tenoient ainsi a mon advis affin de mieulx & plus aiseement faire les cadances de dessus, de ladicte main droicte. Il me souviens d'avoir veu jouer d'une flutte double (venant du mont sainct Claude que Ptolomée appelle le mont Juras) l'une desquelles estoit couppée plus courte, & faisoit une tierce sur la plus grande, & celluy qui en jouoit des deux mains les faisoit accorder harmonieusement. CAPRIOL. Valere maxime, au chappitre dés Institutions, anciennes parle du college des joueurs de Tibies. ARBEAU. Ce college estoit comme les bandes des joueurs d'instruments qui sont par les villes: Et jouoient de diversités de Tibies, les unes comme celles dont nous venons de parler, aultres à neuf trous, aultres avec languettes de rozeaulx, approchans le son des trompettes comme sont noz haulbois, desquelz parle le Poëte Horace disant ainsi: Tibia non ut nunc oricalcho cincta, tubeque Æmula. CAPRIOL. A la verité les haulbois ont quelque ressemblance aux trompettes, & font une consonance assez aggreable, quand les gros sonnans l'octave en bas, sont menez ensemblément avec les petits haulbois qui tiennent l'octave en hault. ARBEAU. Ceste couple est bonne pour faire resonner un grand bruit, tel qu'il fault és festes de village & grandes assemblees, mais si elle estoit joincte avec la flutte, elle offusqueroit le son de ladite flutte: Bien la peult-on joindre avec le tabourin, ou avec le grand tambour. CAPRIOL. Se peult-on ayder du grand tambour pour la dance recreative? ARBEAU. Ouy certes: mesmement avec lesdits haulbois qui sont bruyans & cryards, & sont soufflez avec force. [IMAGE] CAPRIOL. Revenons au propos du Tabourin, & de la dance. ARBEAU. Le tabourin accompaigné de la flutte longue entre aultres instruments, estoit du temps de nos peres emploié pource qu'un seul joueur suffisoit à mener des deux ensemble, & faisoient la symphonie & accordance entiere sans qu'il fust besoing de faire plus grand despence, & d'avoir plusieurs aultres joueurs comme violons, & semblables, maintenant il n'est pas si petit manouvrier qui ne veuille a ses nopces avoir les haulbois & saqueboutes. Lors on dançoit plusieurs sortes de dances recreatives. CAPRIOL. Dites moy quelles sont ces dances, & comment il s'y fault conduire. ARBEAU. On dançoit pavanes, basse-dances, branles & courantes: les basse-dances sont hors d'usage depuis quarante ou cinquante ans: Mais je prevoy que les matrones sages & modestes les remettront en usage, comme estant une sorte de dance pleine d'honneur & modestie. CAPRIOL. Comment est-ce que noz peres dançoient la basse-dance? ARBEAU. Il y avoit deux sortes de basses dances les unes communes & regulieres les aultres irregulieres. Les regulieres estoient appropriées aux chansons regulieres & les irregulieres aux chansons irregulieres. CAPRIOL. Qu'appellés vous chansons communes & regulieres. ARBEAU. Les musiciens d'alors composoient leurs chansons de seize mesures qu'ils repetoient, & ainsi estoient trente deux mesures pour le commencement: & pour la mediation mectoient seize mesures, & sur la fin seize mesures repetées qui faisoient trente deux mesures, ainsi en tous estoient quatrevingtz mesures, dont la basse dance commune & reguliere estoit composee: Et si d'aventure l'air de la chanson passoit ces octante mesures, la basse-dance jouée sur icelle, estoit appellee irreguliere. CAPRIOL. Quelz mouvemens convenoit-il faire pendant ces mesures? ARBEAU. Il vous fault auparavant sçavoir que les chansons des basse dances sont jouees par mesure ternare, & à chacune mesure, le tabourin pour s'accorder avec sa flutte, faict sa mesure ternaire aussi: En frappant lesdictes octante mesures de son batonnet, lesdictes mesures consistant d'une minime blanche & de quatre noires ainsi: [PARTITION] et a chacune mesure, le danceur faict les mouvements des pieds & du corps, selon les preceptes de la dance. CAPRIOL. Comment feray-je ces mouvements, quant je voudray dancer une basse-dance. ARBEAU. En premier lieu, quand vous serés entré au lieu, ou est la cómpagnie preparée pour la dance, vous choisirés quelque honneste damoiselle telle que bon vous semblera. & ostant le chappeau ou bonnet, de vostre main gaulche, luy tendrés la main droicte pour la mener dancer. Elle sage & bien aprise, vous tendra la main gaulche, & se levera pour vous suyvre. Lors la conduyrés au bout de la salle, a la veüe d'un chacun, & advertirés les joueurs d'instrumentz de sonner une basse dance. Car aultrement ilz pouroient sonner par inadvertence quelque aultre sorte de dances. Et quant ilz commenceront à sonner, vous commencerés à dancer. Et notterés que leur demandant une basse dance, ilz entendront assés qu'en demanderés une reguliere & commune: toutesfois si lair d'une chanson sur laquelle est formée une basse dance vous aggreoit plus que d'une aultre pourrés leur nommer le commencement de la chanson. CAPRIOL. Si la damoiselle refusoit je serois bien honteux. ARBEAU. Une damoiselle bien apprise, ne refuse jamais celluy qui luy faict cêt honneur. de la mener dancer & si elle le faict, elle est reputée sotte, car si elle ne veult dancer elle ne se doibt pas mectre au renc des aultres. CAPRIOL. Je le croy bien, mais tandis la honte du refus en tumberoit sur moy. ARBEAU. Si vous estiés asseuré de la bonne grace d'une aultre damoiselle de la compaignie, il la fauldroit prendre & laisser cette mal gracieuse, en vous excusant de luy avoir esté importun: toutesfois il s'en treuveroit assés d'aultres, qui ne le porteroient pas si patiemment: mais il vault mieulx parler ainsi doulcement, qu'avec une aigreur, & ainsi faisant vous acquerrés reputation d'estre doulx & humain, & rejecterés sur elle la marque d'une glorieuse: indigne de l'honneur que luy faisiez. CAPRIOL. Nous voila plantés au bout de la sale, les joueurs commencent à sonner la basse dance, par quelz mouvementz commencerons nous à marcher? ARBEAU. Le premier mouvement est la reverence, marquée par une grande R. La deuxieme sorte de mouvement, est le branle, marqué par un b. La troisieme sorte de mouvement, sont deux simples, marqués par ss. La quatrieme sorte de mouvement est le double, marqué par un d. La cinquieme sorte de mouvement, est la reprise, marquée par une petite r. CAPRIOL. Est-ce la tout ce qu'il fault dancer en une basse dance commune & reguliere? ARBEAU. Il n'y à point d'aultres sortes de mouvements en la basse dance ny au retour de ladicte basse dance, bien y sont lesdictes sortes repetées plusieurs fois. CAPRIOL. Qu'entendés vous par ce retour de basse dance? ARBEAU. La basse dance entiere contiens trois parties: La premiere partie est appellée basse dance: La seconde partie est appellée retour de la basse dance: Et la troisieme & derniere partie, est appellée tordion. Je vous en ay icy mis par escript un memoire, affin que l'appreniez par coeur Memoire des mouvementz pour la basse dance. R b ss d r d r b ss ddd r d r b ss d r b c. CAPRIOL. Que veult dire ceste lettre c que vous avez mise à la fin? ARBEAU. Elle signifie le congé qu'il fault prendre de la Damoiselle, en la saluant, la tenant tousjours par la main pour retourner ou l'on a commencé, affin de dancer la seconde partie & retour de ladicte basse dance. Memoire des mouvementz pour le retour de la basse dance. b d r b ss ddd r d r b c. Ceste lettre c finale, signifie congé comme l'aultre, & n'y a point de grand R au commencement de ce retour, parce qu'on le commence sans faire la reverence. laquelle se differe jusques aprés le congé, avant que commencer le tordion. CAPRIOL. Exposez moy particulierement & par le menu les gester & mouvements signifiés par ces lettres & memoires. ARBEAU. La reverence premier geste & mouvement, tient quatre battements de tabourin, qui accompaignent quatre mesures de la chanson que sonne la flutte. Anthoine Arena considerant que toutes dances commencent par le pied gauche, a esté d'advis que la reverence doit estre faicte du pied gauche, toutesfois il semble en fin qu'il le remette en doute, disant ainsi: Bragardi certant, & adhuc sub iudice lis est, De quali gamba sit facienda salus. Quand à moy, je tiens avec mon maistre, sous lequel j'ay aultresfois appris à Poictiers, qu'il la fault faire du pied droit: [IMAGE] Ce faisant on a moyen de tourner le corps & la face devers la Damoiselle, & luy jetter un gracieux regard. CAPRIOL. Le branle suit la reverence, comment le fault-il faire? ARBEAU. Le branle est appellé par Arena Congedium. & croy qu'il le nomme ainsi, pource qu'à veoir le geste du danceur, il sembleroit qu'il voulust finir & prendre congé, & neantmoins apres le branle, il continue ses marches & mouvements, comme ils sont escrits ésdits memoires: Ledit branle se faict en quatre battements de tabourin, qui accompaignent quatre mesures de la chanson jouee par la flutte, en tenant les pieds joincts, remuant le corps doucement du cousté gauche pour la premiere mesure, puis du cousté droit, en regardant les assistans modestement pour la deuxieme mesure, puis encor du cousté gauche pour la troisieme mesure: Et pour la quatrieme mesure du cousté droit, en regardant la Damoiselle d'une oeillade desrobee doulcement & discretement. [IMAGE] CAPRIOL. Deux simples suyvent le branle, comment fault-il les faire? ARBEAU. Vous marcherez en avant du pied gauche pour la premiere mesure: Puis mettrez le pied droit joinct avec ledict gauche pour la deuxieme mesure: Puis avancerez le pied droit pour la troisiesme mesure: Et à la quatrieme mesure & battement joindrez le pied gauche avec ledict pied droit, & ainsi sera parfaict le mouvement des deux simples: Et se fault donner garde de faire les avonces des pieds si grandes qu'il semble qu'on veuille mesurer la longueur de la salle, joinct que la Damoiselle ne pourroit honnestement faire de si grandes passees comme vous feriez. Arena & aultres de sa sequelle font le simple d'un mesme pied, marquant pour la premiere mesure du pied gauche a cousté du droit, puis advanceant ledit gauche. Et aultant du pied droit: Mais il me souvient que mon maistre de Poictiers impreuvoit ceste mode, disant qu'il estoit plus décent de finit les deux simples par les pieds joincts, que par l'advance de l'un des pieds. CAPRIOL. Ceste raison me semble bonne, & suivray vostre opinion: Venez à ceste heure au double, par quel mouvement le fault-il faire? ARBEAU. Le double se faict en quatre mesures & battements du tabourin: Sur la premiere mesure, fault avancer le pied gauche. Sur la seconde mesure, il fault advancer le pied droit. Sur la troisiesme mesure, il fault encor avancer le pied gauche: Et sur la quatrieme mesure, il fault joindre le droit avec ledit gauche. Et ainsi en 4. mesures sera complet le double: Et s'il y a deux doubles: L'aultre double suyvant se faict au contraire du premier, avanceant le pied droit, puis le pied gauche, puis encor le pied droit: Et à la quatrieme mesure fault joindre le pied gauche avec le droit: Et ainsi en huict mesures demeuerront accomplis les deux doubles. Et pour faire encor ung troisiesme double, il fault advancer le pied gauche, puis le pied droit, puis le gauche, puis tumber a pieds joincts comme a esté faict au premier double: Et ainsi demeurent les trois doubles achevez en douze battements & mesures du tabourin. CAPRIOL. Il reste encor à sçavoir comme l'on faict une reprise, ARBEAU. Le mouvement appellé reprise, precede ordinairement le branle, & quelquesfois le double, & tient quatre mesures du tabourin aussi bien comme les aultres mouvements, lequel vous ferez en remuant un peu les genoux, ou les pieds, ou les artoils seullement, comme si les pieds vous fremioient: Sçavoir sur la premiere mesure les artoils du pied droit, puis encor lesdits artoils du pied droit sur la seconde mesure, puis les artoils du pied gauche sur la troisieme mesure: & les artoils dudit pied droit sur la quatrieme mesure: Et en ces quatre mouvements demeure accomplie la reprise & le danceur, prest à faire le branle ou les aultres mouvements qui suivent. CAPRIOL. Si nous voulions appeller les 4. mesures du tabourin & de la flutte ung quaternion ou tetradion: Je treuve en comptant les caracteres que m'avez donnez par memoire, que la basse dance contient vingt quaternions: Et le retour de la basse-dance contient douze quaternions. ARBEAU. La supputation en est bonne: Et aprés la basse-dance & le retour de la basse-dance: Vous pourrez commencer la dance du tordion, qui est en mesure ternaire, comme est la basse-dance: Mais elle est plus legiere & concitee. CAPRIOL. Le tordion est-il composé des mesmes mouvements de la basse-dance & son retour, c'est à dire de simples, doubles, reprises & branles? ARBEAU. C'est une aultre sorte de mouvements qui consiste de certaines assiettes de pieds & une cadance, ce que je vous donneray plus clairement à entendre quant nous parlerons de la gaillarde, car le tordion n'est aultre chose qu'une gaillarde par terre. CAPRIOL. Apprenez moy les mouvements de ceste gaillarde. ARBEAU. Nous en parlerons aprés que nous aurons parlé de la pavane, laquelle on dançoit ordinairement auparavant la basse-dance: Ladicte pavane n'a pas esté abolie & mise hors d'usage du tout, & croy qu'elle ne le sera jamais, vray est qu'elle n'est pas si frequentée que par le passé: Noz Joueurs d'instruments la sonnent quand on meyne espouser en face de saincte Eglise une fille de bonne maison, & quant ils conduisent les prebstres, le batonnier & les confreres de quelque notable confrairie. CAPRIOL. Attendant que traictiez de la gaillarde, dictes moy de quels mouvements il fault user en la pavane. ARBEAU. La pavane est facile à dancer, car il n'y a que deux simples & un double, en marchant & savanceant. Et deux simples & un double en reculant & desmarchant: Et se joue par mesure binaire. Et notterez qu'en la dançeant, lesdits deux simples & ledit double de l'advance, se commencent par le pied gauche: Et lesdits deux simples & le double de la desmarche, se commencent par le pied droit. CAPRIOL. Le tabourin donc & aultres instruments y font huict battements & mesures en marchant, & huict mesures en desmarchant. ARBEAU. Il est ainsi: Es si on veut on ne recule point, & marche lon tousjours avant. CAPRIOL. Ne faict-on point de demarches en danceant la basse-dance? ARBEAU. Quelquesfois il y a si grand presse & multitude de personnes en la salle, que la place pour dancer est racoursie, parquoy quand vous serez prez du bout, fauldra que faciez de deux choses l'une, ou que desmarchiez vous & la damoiselle que vous menez, ou bien que faciez une conversion. CAPRIOL. Qu'entendez vous faire conversion? ARBEAU. C'est à dire qu'approchant du bout, vous faciez tousjours aller droit la damoiselle, & vous desmarchiez aultant quelle marchera, jusques à ce qu'aiez torné le doz du cousté qu'aviez les visaiges. CAPRIOL. Lequel des deux vous semble le meilleur à faire? ARBEAU. Mon opinion est qu'il vault mieux user de conversion, affin que la damoiselle puisse veoir ou elle marche, car si elle treuvoit quelque empeschement en faisant les desmarches, elle pourroit tumber, chose qui vous torneroit à blasme, & qui vous reculeroit de ses bonnes graces. Et ainsi me semble debvoir estre faict és pavanes quant on les veult dancer, en faisant deux ou trois tours par la salle. CAPRIOL. Le battement du tabourin pour la pavane, est il comme pour la basse-dance? ARBEAU. Il est binaire, consistant d'une minime blanche & de deux noires, en ceste façon: [PARTITION] CAPRIOL. Je treuve ces pavanes & basse-dances belles & graves, & bien seantes aux personnes honorables, principalement aux dames & damoiselles. ARBEAU. Le Gentil-homme la peult dancer ayant la cappe & lespee: Et vous aultres vestuz de vos longues robes, marchants honnestement avec une gravité posee. Et les damoiselles avec une contenance humble, les yeulx baissez, regardans quelquesfois les assistans avec une pudeur virginale. Et quant à la pavane, elle sert aux Roys, Princes & Seigneurs graves, pour se monstrer en quelque jour de festin solemnel, avec leurs grands manteaux & robes de parade. Et lors les Roynes, Princesses, & Dames les accompaignent les grands queües de leurs robes abaissees & traisnans, quelquesfois portees par damoiselles. Et sont lesdites pavanes jouees par haulbois & saquebouttes qui l'appellent le grand bal, & la font durer jusques à ce que ceux qui dancent ayent circuit deux ou trois tours la salle si mieulx ils n'ayment la dancer par marches & desmarches. On se sert aussi desdictes pavanes quant on veult faire entrer en une mascarade chariotz triumphantz de dieux & deesses, Empereurs ou Roys plains de majesté. CAPRIOL. Mettez moy par escript les airs d'une pavane & dune basse-dance. ARBEAU. Je le veuls bien pour le desir que j'ay que telles dances honnestes soient remises au dessus, en lieu des dances lascives & deshontees que l'on à introduict en leur place au regret des sages seigneurs & des dames & matrones de bon & pudique jugement. Premierement je vous donneray une pavane avec le battement du tabourin en mesure binaire pesant. accompaignee de la taille, haulte-contre, & basse contre, laquelle suffira pour sçavoir dancer toutes les aultres, & si voulez sans la dancer, la ferez chanter ou jouer à quatre parties. Puis aprez je vous donneray une basse-dance commune, avec son retour & le tordion, laquelle semblablement vous servira pour toutes aultres, pourveu que sçachiez par coeur ce que je vous en ay donné par escrit cy dessus: Pavane à quatre parties: avec les mesures & battements du tambour, [PARTITION] la pavane cy dessuz mise a quatre parties, tient deux advances & deux desmarches marquées par leurs caracteres ainsi ss d ss d ss d ss d & tient trante deux mesures & battements de tabourin. Et pour la prolonger fault recommencer tant de fois qu'il plaist aux joueurs d'instruments ou aux danceurs, & parce qu'il vous pourra prendre quelque jour envie de chanter la chanson entiere, la voicy par escript. CHANSON. Belle qui tiens ma vie Captive dans tes yeulx, Qui m'as l'ame ravie D'un soubz-ris gracieux, Viens tost me secourir Ou me fauldra mourir. Pourquoy fuis tu mignarde Si je suis pres de toy, Quand tes yeulx je regarde Je me perds dedans moy Car tes perfections Changent mes actions. Tes beautéz & ta grace Et tes divins propos. Ont eschauffé la glace Qui me geloit les os, Et ont remply mon coeur D'une amoureuse ardeur. Mon ame souloit estre Libre de passions, Mais amour s'est faict maistre De mes affections, Et à mis soubs sa loy Et mon coeur & ma foy. Approche donc ma belle Approche toy mon bien, Ne me sois plus rebelle Puis que mon coeur est tien, Pour mon mal appaiser, Donne moy un baiser. Je meurs mon Angelette Je meurs en te baisant, Ta bouche tant doucette Va mon bien ravissant A ce coup mes espritz Sont tous d'amour espris. Plustost on verra l'Onde Contre mont reculer Et plustost l'oeil du monde Cessera de brusler, Que l'amour qui m'époinct Decroisse d'un seul poinct. CAPRIOL. Ceste dance de pavane est trop grave & pesant, pour dancer en une salle avec une jeune fille seul à seul. ARBEAU. Les joueurs d'instruments la sonnent aulcunes fois moins pesamment, & d'une mesure plus legiere, & par ce moyen elle se ressente de la mediocrité d'une basse-dance, & lappellons passe meze. Depuis peu de temps ils en ont apporté une qu'ils appellent la pavane d'Espagne, laquelle se dance decoupee avec diversité de gestes, & par ce qu'elle à quelque conformité avec la dance des Canaries, je ne vous en declareray point la mode de la dancer, jusques à ce que nous soyons en propos desdictes Canaries, seullement vous entendrez icy qu'il y à aulcuns danceurs, lesquels decoupent le double qui est aprez les deux simples: Car en lieu que ledit double ne seroit que de quatre mesures notees par quatre semibreves, ils en font huict minimes blanches ou seize minimes noires, & consequemment font plusieurs assiettes de pieds, passages & fleurets, lesquels retumbent en mesme cadance, & sont de mesme duration de temps, & tels decoupements & mouvements de pieds legierement faicts, moderent la gravité de la pavane, joinct qu'aprez la pavane, on dance coustumierement la gaillarde qui est legiere. CAPRIOL. Apprenez moy tous ces passages & decouppements. ARBEAU. Vostre desir n'est aultre chose que de sçavoir comment on peult hacher par le menu ung double. Les bons danceurs agilles & gaillards y peuvent faire tant & tels decouppements & hachures que bon leur semble pourveu qu'ils retumbent (comme je vous ay dit) a leur cadance, le pied apresté pour marcher les deux simples qui suyvent ledit double: Et quelquesfois ils anticipent leur passages sur le deuxieme simple. Vous entendrez ces passages & decouppements quant vous sçaurez les modes & façons diverses de mouvoir les pieds, dont nous parlerons en declarant la dance de la gaillarde. Cependant je vous donneray icy par escript l'air d'une basse-dance commune, avec la mesure ternaire du tabourin. CAPRIOL. Fault-il necessairement qu'és pavanes & basse-dances le tabourin & la flutte y soient employez. ARBEAU. Non qui ne veult: Car on les peult jouer avec violons, espinettes, fluttes traverses & à neuf trouz, haulbois, & toutes sortes d'instruments: Voires chanter avec les voix: Mais le tabourin ayde merveilleusement par ses mesures uniformes à faire les assiettes des pieds selon la disposition requise pour les mouvements. Basse-dance appellee: Jouyssance vous donneray: avec les mesures & battemens du tabourin. [PARTITION] Si tost que vous entendrés le dernier battement du branle precedent le congé vous tournerés le corps devers la damoiselle pour (ostant le bonnet faisant la reverence) prendre ledict congé, & la restituer ou vous avés commencé la basse-dance affin de dançer le retour de ladicte basse-dance selon les battements du tabourin & les mouvementz qui sensuyvent. Retour de la basse-dance avec le battement du tabourin. [PARTITION] CAPRIOL. J'eusse bien voulu que m'eussiez mis par escript cinq ou six pavanes, & autant de basse dances. ARBEAU. Vous en treuverez assez grand nombre dedans les livres de danceries imprimez par feu Attaignant, qui demeuroit pres l'Eglise sainct Cosme à Paris, & dedans les livres de feu maistre Nicolas du Chemin Imprimeur audit Paris, à l'enseigne du Lion d'argent: Toutesfois, il vous fauldra reduire en mesure ternaire lesdictes basse-dances, lesquelles sont mises en mesure binaire. CAPRIOL. Qui vous empescheroit de les reduire comme vous dictes, & de les me donner par escript? ARBEAU. Quand on sçais les marches & mouvements d'une pavane & d'une basse-dance commune, on peult dancer toutes les aultres: Car encores qu'elles soient differentes en airs, & qu'elles sont chantées ou jouees diversement, elles sont semblables en mesure. C'est donc afaire aux joueurs d'instruments d'en apprendre de plusieurs sortes: & quand à vous, il vous doibt suffire de sçavoir comme il les fault dancer, ce qui vous est maintenant facile, parce qu'en avez apris & entendu. CAPRIOL. Vous obliez de me parler des basse-dances irregulieres, & non communes. ARBEAU. Elles n'ont point d'aultres sortes de mouvements que les communes, & different seullement en ce qu'elles sont plus longues ou plus courtes, ou bien egales, mais les mouvements sont disposez aultrement qu'en la basse-dance commune. Arena en a faict ung inventaire que je ne reciteray point icy, parce qu'on n'en dance guieres, & aussi qu'il suffict que sçachiez pour ceste heure la commune, seullement je vous en donneray trois par escript: L'une de vingt quatre quaternions, qui est des plus grandes: L'aultre de quatorze quaternions, qui est des plus courtes: Et une de vingt quaternions, comme la commune. Memoire des mouvements de la basse-dance appellee confortez-moy, de vingt quatre quaternions, qui tiennent nonante six mesures. R b ss d ss r b ss d ss r b ss ddd ss r b ss d ss r b c. Bassedance appellee toute-frelore à quatorze quaternions, qui tiennent cinquante six mesures & battements du tabourin. R b ss d ss r b ss ddd ss r b c. Basse-dance appellee patience, contenant vingt quaternions comme la commune, qui font octante mesures & battements de tabourin, laquelle toutesfois est irreguliere. R b ss d r d ss r b ss ddd r b ss d ss r b c. Je vous ay bien voulu descripre ces trois pour toutes les aultres, ausquelles ne prendrez pas grand esgard par ce que du passé peu de personnes les dançoient, & n'y avoit à les dancer que-ceulx qui se vouloient gloriffier par dessus les aultres, & faire entendre qu'ils avoient bonne memoire: Et trompoient souvent par tel moyen ceulx qui sçavoient seullement dancer la commune: Car si tost qu'ils voyoient ung aultre vouloir dancer avec eulx, ils demandoient l'une de ces irregulieres. CAPRIOL. Peut-on dancer plusieurs ensembles? ARBEAU. Vous pourriez (s'il vous plaisoit) mener deux Damoiselles: Mais il suffit d'une, & dit le commun pròverbe que Trop en ha qui deux en meine. Semblablement quant estes planté au bout de la salle avec une Damoiselle, ung aultre peult se planter avec sa maistresse à l'aultre bout de la salle viz à viz de vous pour dancer: Et quant vous aprochez les ungs des aultres, il fault retrograder ou user de conversion. Je vous ay declaré cy devant, que cest a dire user de conversion. CAPRIOL. Vous m'avés dit qu'aprés la basse-dance & son retour, il falloit dancer le tourdion, & que le tourdion estoit une espece de gaillarde, & m'avés remis a me parler du tourdion, quant vous seriez en propos de la gaillarde. ARBEAU. Ceulx qui dancent la gaillarde aujourd'huy par les villes, ilz dancent tumultuairement, & se contentent de faire les cinq pas & quelques passages sans aulcune disposition & ne se soucient pourveu qu'ilz tumbent en cadance: tellement qu'une grande partie de leurs meilleurs passages sont incogneuz & perduz: Du commencement on la dançoit avec plus grande discretion. Car aprés que le danceur avoit prins une damoiselle, & qu'ilz s'estoient plantés au bout de la salle, ilz faisoient aprés la reverence, un tour ou deux par la salle, marchans simplement: Puis le danceur laschoit ladicte damoiselle, laquelle alloit en danceant jusques au bout de ladicte salle, ou estant, elle faisoit une station en danceant en ce mesme lieu: Cependant le danceur qui la suyvoit se venoit presenter devant elle, & y faisoit quelque passage en tornant s'il vouloit à droict, puis à gauche. Ce faict, elle marchoit danceant jusques à l'àultre bout de la salle ou ledict danceur l'alloit chercher en danceant, pour faire devant elle quelque aultre passage. Et ainsi continuants ces allees & ces venues, ledict danceur faisoit passages nouveaux, monstrant ce qu'il sçavoit faire, jusques à ce que les joueurs d'instruments faisoient fin de sonner. Lors il faisoit la reverence, prenant là damoiselle par la main en la remerciant, la restituoit au lieu ou il l'avoit prise. CAPRIOL. Ceste façon de dancer me semble plus louable, que d'y aller sans disposition, ainsi que je les y voy aller ordinairement, car le plus souvent le danceur torne le doz à la damoiselle, ou qui vault aussi peu: la damoiselle torne le doz au danceur pendant qu'il faict quelque passage. ARBEAU. Depuis quelque temps on dance la gaillarde d'une façon qu'ils appellent la lyonnoise, en laquelle le danceur faisant place à ung aultre, prend congé de la damoiselle, la laisse & se retire: Elle ainsi laissee seulle, continue la dance peu de temps, puis va choisir ung aultre danceur, & aprés avoir dancé par ensemble, elle prend congé de luy, & le laisse seul & se retire: Et se continuent ces changements tant que la gaillarde dure. CAPRIOL. S'il ny a pas assez de filles ou de danceurs pour changer, peult on choisir ceulx qui ja ont dancé? ARBEAU. Vous le pourrez faire. Mais ceste façon a esté introduicte por faire entrer en la dance toutes les damoiselles de la compagnie, pour obvier à la mauvaise coustume d'aucungs qui indiscrets en leurs affections, veullent tousjours mener celle qui leur est favorite: Et aussi que par le moyen de ces rechanges, les moings belles peuvent estre appellees à la dance. CAPRIOL. Quels mouvements sontnecessaires à ceste dance, que l'on nomme gaillarde? ARBEAU. La gaillarde est appellee ainsi parce qu'il fault estre gaillard & dispos pour la dancer: Et combien qu'elle se dance par une pesanteur raisonnable, les mouvements y sont gaillards: Car il la fault plus pesante pour un homme de grande stature, que pour ung petit: Daultant que le grand mect plus de temps à faire les pas & à getter & retirer ses pieds que le petit. Elle comprend soubz soy le tourdion que nous vous avons dit cy devant debvoir estre dancé à l'yssue du retour de la basse dànce: Mais ledit tourdion se dance plus doulcement, & avec actions & gestes moings violents. CAPRIOL. Quels mouvements servent à la gaillarde & au tourdion? ARBEAU. La gaillarde debvroit tenir six assiettes de pieds, consideré qu'elle consiste de six minimes blanches sonnees par deux mesures ternaires ainsi: [PARTITION] Toutesfois elle ne tient que cinq assiettes de pieds, parce que la cinquieme & penultime notte & minime blanche est consummee & perdue en l'air, comme vous voyez cy dessoubz ou elle est deffaillante, & en son lieu y est mis ung souspir equipolent à icelle: Tellement qu'il n'y demeure que cinq nottes: Et en comptant pour chacune notte une assiette de pied, fault faire compte de cinq assiettes, & non plus, [PARTITION] CAPRIOL. C'est donc ce que j'entends si souvent dire que le danceur de gaillarde doibt avant toutes choses sçavoir ses cinq pas: Mais comment faict-on ces cinq pas ou assiettes? ARBEAU. Il y a plusieurs manieres d'assiettes, par les meslanges desquelles on bastit les diversitez des passaiges: Et d'icelles sont tirez & procreez les vocables propres servants à cest art. CAPRIOL. Vous les m'avez cy devant nommez & apris: N'est-ce pas reverence, branle, deux simples, double, & reprinse, desquels m'avez donné par escript les caracteres R b ss d r. ARBEAU. Les assiettes de la gaillarde & du tourdion sont aultres, comme je vous exprimeray, & non sans raison, parce que les marchez & mouvements de la pavane & de la basse-dance sont pesants & graves: Et ceulx de la gaillarde & du tourdion sont legiers & gaillards, tellement que les jeusnes hommes de vostre aage sont plus aptes à les dancer que les vieillards comme moy: Et pour plus claire intelligence, je vous en donneray les figures, & leurs noms dessus, si le treuvez bon, & treuvez qu'il vous soit necessaire de les avoir. CAPRIOL. Je vous prie faire en sorte que je puisse aiseement comprendre ce qu'il vous plaira m'enseigner, & ny point espargner les figures, car je trouve qu'elles servent grandement à l'intelligence de la parolle & à la memoire locale. ARBEAU. Au commencement d'une gaillarde, il fault presupposer que le danceur tenant la Damoiselle par la main, faict la reverence lors que les joueurs d'instruments commencent à sonner, laquelle reverence faicte, se renge en une contenance belle & decente. Pour faire la reverence, vous tiendrez le pied gaulche ferme à terre, & pliant le jarret de la jambe droicte, porterez la pointe de l'arteil de la semelle droicte derrier ledict pied gaulche: Ostant vostre bonnet ou chappeau, & saluant vostre Damoiselle & la compagnie, comme voyez en ceste figure: [IMAGE] Reverence. [IMAGE] Aprez que la reverence est ainsi faicte, redresserez le corps, & recouvrant vostre teste, retirerez vostredict pied droict, & vous mettrez & poserez les deulx pieds joincts, que nous entendons estre contenance decente, quand les deulx pieds sont tellement disposez, quilz sont l'un au droict de l'aultre, comme vous voyez en la figure cy dessoubz, les arteils desquels sont dirigez en ligne droicte, & soubstiennent egallement le corps du danceur. Pieds joincts [IMAGE] Et si d'avanture l'une des semelles demeure diréctement posee pour soubztenir seulle la pesanteur du corps, & le tallon de l'aultre pied se joinct a icelle, & torne l'arteil obliquement: Ceste contenance sera appellee pied joincts oblique, dont il en est de deux sortes: Sçavoir pied joinct oblique droict, quand le pied droict se repose obliquement, & que le gaulche direct soubztient le corps du danceur: L'aultre sorte est appellee pied joinct oblique gaulche, quand le pied gaulche se repose obliquement, & que le pied droict soubztient le corps du danceur. CAPRIOL. Vous ne me dictes point comme pourra estre ceste obliquité, ce que je ne vous demande pas sans cause, car les Geometres tiennent qu'entre les lignes de l'esquierre, il y a infinies lignes obliques. ARBEAU. Ceste obliquité est delaissee à l'arbitraige du danceur, tellement que s'il luy plait, il mettra le pied qui se repose à l'esquierre contre le pied qui soustient le corps, ou en tel lieu qu'il luy plaira, entre deux, approchant le pied joinct, pourveu que ce ne soit ledit pied joinct: Car de passer le traict de l'esquierre, la flexion de la jambe ne le permect naturellement: Voyez cy la figure dudit mouvement des pieds joincts obliques. Pied joinct oblique droict. [IMAGE] Pied joinct oblique gaulche. [IMAGE] Les mouvements de ces pieds joincts vous apprendront que cest des mouvements contraires, que nous appellons pieds largis, qui se font quand les deux pieds sont a terre, portans tous deux esgallement la pesanteur du corps, mais en lieu d'estre joincts, ils sont eslargiz l'un de l'aultre competemment, non pas d'un eslargissement forcé & contrainct comme estoient les pieds du Colosse representant la statue du Soleil, getté en cuyvre par Colossus ou Charetes disciples de Lysippus planté à Rhodes, ayant septante couldees de haulteur, qui peuvent monter à environ cens cinq de nos pieds de Lengres. Ce Colosse avoit les jambes eslargies tant que le naturel le peult endurer, tellement que les navires passoient aiseement entre deux. CAPRIOL. Ce n'est donc sans cause qu'il est nombré entre les merveilles du monde, & fut grand dommage de ce que cinquante six ans aprez il tumba par un tremblement de terre: Je vouldrois l'avoir veu, pour essayer s'il est vray ce qu'on en a escript, que peu de gens se sont treuvez lesquels peussent embrasser son poulce: Mais laissant ceste histoire, j'entends bien comme voulez que les pieds largiz soient faicts, c'est qu'ils ne soient pas trop eslargiz & esquartez, ny aussi trop proches, ou joincts ensemble. Pieds largyz. [IMAGE] ARBEAU. Ce mouvement & contenance de pieds largiz se faict aussi quand l'un des pieds porte la pesanteur du corps, & l'aultre pied mis obliquement se repose, ce qui peult advenir aussi en deux sortes: Sçavoir quand les pieds estans largiz, le pied droict se repose obliquement, & le gaulche soustient le corps du danceur: Et s'appelle pied largy oblique droict: L'aultre sorte est au contraire, quand le pied gaulche repose obliquement, & le pied droict soustient le corps: Et s'appelle pied largy, oblique gaulche. Pieds largis oblique droict. [IMAGE] Pieds largis oblique gaulche. [IMAGE] CAPRIOL. Vous me venez de proposer six manieres de contenances & mouvements, lesquelles treuvez vous les plus decentes. ARBEAU. L'une de celles qui ont le pied oblique me semble plus belle, car nous voyons és medalles & statues antiques, que les Monopodes sont treuvez plus artistes & plus aggreables. Et quand aux pieds joincts ou aux pieds eslargis directement, ils sentent leur contenance foeminine: Et tout ainsi qu'il est mal-seant à une Damoiselle d'avoir une contenance hommace, aussi doibt l'homme eviter les gestes muliebres: Ce que vous pouvez apercevoir aux reverences, car à les faire, les hommes portent brusquement le pied croisé en derrier: & les Damoiselles plient les deux genoulx doulcement, & se relevent de mesme: Et ce pendant que je suis en propos de la reverence, je vous veulx dire que telles reverences salutatoires que lon faict au commencement, à la fin, & quelquesfois au meillieu des dances, ne sont comprinses au nombre des mouvements gaillards: Bien y sont comprinses deux aultres sortes de reverences passagieres, cest a dire servants a aulcuns passages de la gaillarde. CAPRIOL. Quelle difference y à-il entre ces passagieres & les salutatoires. ARBEAU. En la reverence passagiere, il ne fault point oster le bonnet ou chappeau: Et combien qu'elle soit quasi faicte de mesme, en pliant le jarret & mettant le pied derrier, si est-ce qu'elle se faict en plus brief temps, comme vous sçavez plus à plain: Il en est de deux sortes, l'une quand le pied gaulche soustenant le corps, le pied droict se croise en derrier, & s'appelle reverence passagiere droicte Laultre sorte est quand le pied droict soustenant le corps, le pied gaulche se croise en derrier, & s'appelle reverence passagiere gaulche. Reverence passagiere droicte. [IMAGE] Reverence passagiere gaulche. [IMAGE] En poursuyvant le denombrement des pas & mouvements, je diray qu'il y a un mouvement qui s'appelle pied croisé, quand on gette l'un des pieds pour soustenir le corps, & en mesme instant on met l'aultre pied en l'air devant la greve, & se faict en deux sortes: sçavoir quand le pied gaulche soustient le corps & le droict est croisé en l'air devant ledit gaulche, & s'appelle pied croisé droict: Et au contraire quand le pied droict soustient le corps du danceur, & le pied gaulche est croisé en l'air devant la greve dudit pied droict, & s'appelle pied croisé gaulche. Pied croisé droict. [IMAGE] Pied croisé gaulche. [IMAGE] CAPRIOL. Voila desja de plusieurs sortes de gestes & mouvements. ARBEAU. Il vous tarde (à ce que je peulx cognoistre) que vous commenciez a faire les cinq pas, mais il ny a remede, il fault que vous ayez patience d'escouter comme sont faicts tous les mouvements: Car vous sçavez qu'en l'art de grammaire, le disciple faict premierement amas de noms verbes & aultres parties de l'oraison, puis il apprend à les lier ensemble congruement. Ainsi en l'art de dancer, il vous fault premierement sçavoir plusieurs particuliers mouvements, puis par le moyen des compositions que l'on vous donnera par la tabulature, sçaurez le tout. CAPRIOL. Pourray-je pas faire lesdicts assemblements à ma phantaisie, quand je sçauray les mouvements particuliers. ARBEAU. Vous le pourriez: Mais il ne vous y fauldroit pas arrester, que ne les eussiez communiquez aux bons danceurs: Et est bien le meilleur de faire amas de passages ja inventez & receuz, car il y a je ne sçay quelle grace en aucuns passages qui ne se treuve pas en d'aultres. CAPRIOL. Poursuyvez s'il vous plaist le reste des mouvements. ARBEAU. Aulcunesfois l'un des pieds estant getté & posé pour soustenir le corps, on marche du bout de l'arteil de l'aultre pied, contre celluy qui est a terre: Et ce mouvement s'appelle marque pied, sçavoir marque pied droict. quand l'arteil du droict faict ladicte marche: Et marque pied gaulche, quand l'arteil du pied gaulche faict ladicte marche. Marque pied droict. [IMAGE] Marque pied gaulche. [IMAGE] Quand au contraire on marche du tallon de l'un des pieds, l'aultre pied estant getté, pour demeurant ferme, soustenir le corps de celuy qui dance, ceste sorte de mouvement se nomme: Sçavoir marque-tallon droict, quand le talon du pied droict opere, & marque-talon gaulche, quand le talon du pied gaulche y est employé. Marque talon droict. [IMAGE] Marque talon gaulche. [IMAGE] CAPRIOL. Quand à la denomination de ce mouvement marque talon, il me semble qu'elle soit bien appliquee, mais vous deviez donc nommer le precedent mouvement marque arteil, & non pas marque pied. ARBEAU. Vous avez raison: Et le pourrez ainsi denommer si voulez: Mais je l'ay faict parce que ce mot de marque arteil est plus rude & fascheux à pronuncer, que ce mot de marque pied. CAPRIOL. Les Polonois (à ce que jay ouy racompter) marchent ordinairement sur leurs arteils. ARBEAU. Leurs talons sont soustenus & eslevez par le liege ou ferrements mis en leurs souliers, & ne laissent de courir aussi legierement comme nous: Et si vous y advisez de prez, treuverez comme tous les animaulx (peu exceptez) marchent de ceste façon: Cela est cause que les Polonois se monstrent plus grands de deux ou trois doigs qu'ils ne sont. Pour retourner à propos des mouvements de la gaillarde, sçachez encor qu'il y a un certain mouvement & assiette de pieds, que nous appellons coup de pied, ou greve, quand le danceur gette l'un des pieds pour soustenir le corps, & il esleve l'autre en l'air en devant, comme s'il vouloit donner un coup de pied à quelcun: Et se fait tel mouvement en deux manieres, sçavoir le pied droict eslevé que l'on nomme greve droicte, & quand le pied gaulche est eslevé, on le nomme greve gaulche. Quelquesfois ceste eslevation de pieds ne s'esleve qu'un peu hors de terre, & ne s'avance que point ou peu en devant: Et se nomme pied en l'air droict, si le droict est eslevé, ou pied en l'air gaulche, si le pied gaulche est eslevé: Une mesme figure servira pour lesdictes deux sortes de mouvements, seullement vous fauldra souvenir. que quant treuverés en la tabulature ces mots de pied en l'air, ledit mouvement se debvra faire quasi rampant par terre, & doulcement comme le feroit une Damoiselle, & de telz pas & mouvements on use en dançant le tourdion. Et quand treuverez en ladicte tabulature ce mot de greve, ledit mouvement se debvra faire fort eslevé & hardiment. CAPRIOL. Il me souviendra fort bien de cest advertissement, & me souvient bien aussi de la raison que m'en avez donnéé cy devant, car en dançant le tourdion, on tient tousjours la damoiselle par la main: Et qui danceroit ledit tourdion trop rudement, on donneroit trop de peines & de fargots à ladicte Damoiselle. ARBEAU. Aujourd'huy les danceurs n'ont point ces honnestes considerations en ces voltes & aultres semblables dances lascives & esgarees que l'on a amené en exercice, en dançant lesquelles, on faict bondir les Damoiselles de telle mode, que le plus souvent elles monstrent à nud les genoulx, si elles ne mettent la main à leurs habits pour y obvier. CAPRIOL. Ceste mode ne me semble belle ny honneste, si ce n'est pour dancer avec quelque bonne galoise de chambeliere. ARBEAU. Je ne laisseray de vous donner cy aprez la tabulature pour la dancer: Ce pendant voyez cy les figures des mouvements de greve & de pied en l'air. Greve droicte, OU Pied en l'air droict. [IMAGE] Greve gaulche, OU Pied en l'air gaulche. [IMAGE] Ledit mouvement de greve est faict & causé aulcunesfois, quand le danceur gette & met l'un de ses pieds en la place de l'aultre pied, & cependant ledit autre pied est eslevé en l'air devant: Et tel mouvement s'appelle entretaille, & en est aussi de deux sortes, comme il y a deux sortes de greve: Sçavoir entretaille du gaulche, causant greve droicte, & entretaille du droict, causant greve gaulche. CAPRIOL. J'entends bien cela, ce n'est tousjours que le mesme mouvement, fors qu'il commence par ceste entretaille. ARBEAU. Le mouvement contraire à la greve se fait, quand le danceur pour soustenir son corps se gette sur un pied, & il esleve l'autre pied en derrier, & tel mouvement est nommé ruade: Sçavoir ruade droicte, si le pied droict se hausse en derrier: Et ruade gaulche, si le pied gaulche est eslevé en derrier. Ruade droicte. [IMAGE] Ruade gaulche. [IMAGE] Si l'un des pieds est eslevé à coustiere de l'aultre, & non en devant comme la greve, ny en derrier comme la ruade: Ce mouvement s'appelle Ru de vache, parce que les vaches ruent de ceste mode à cousté, & non en derrier comme les chevaulx: dont il en est aussi de deux sortes, Ru de vache droict, quand le pied gaulche est getté pour soustenir le corps, & le pied droict est eslevé: Et Ru de vache gaulche, quand le pied droict est getté pour soustenir le corps, & le pied gaulche est eslevé. CAPRIOL. Ce mouvement de Ru de vache n'est pas guieres usité, comme je croy. ARBEAU. A la verité il n'est pas guieres mis en pratique, mais je ne l'ay peu obmettre, affin de ne rien laisser en arriere pendant que nous sommes en propos des mouvements & pas de la gaillarde: Et serviront ces mesmes non à la gaillarde seullement: Mais aussi aux aultres dances dont nous parlerons cy aprez. CAPRIOL. Ce sera donc aultant de besoigne faicte quand viendrez à traicter desdictes aultres dances, ARBEAU. Il y aura quelque peu de limitation à desduyre. CAPRIOL. Quelle limitation? ARBEAU. Je les vous diray quand nous en serons en propos: Pour le present, voiez les figures des deux sortes de Ru de vache, dont je vous viens naguieres de parler. Ru de vache droict. [IMAGE] Ru de vache gaulche. [IMAGE] Quand les deux pieds sont gettez & posez à terre, l'un devant & l'aultre derrier, supportans tous deux ensemblément le corps du danceur, ceste contenance & mouvement s'appelle position, ou posture, laquelle sert ordinairement pour faire les cadances: Et se fait en deux façons, quand le pied droict est devant, cela s'appelle posture droicte: Et si le pied gaulche est devant, il s'appelle posture gaulche: En ces postures, il y a un petit advertissement, cest que lesdites postures ont meilleur grace quand elles se font le pied derrier posé sur terre un peu plus tost que celuy devant: Car quand on les pose tous deux ensemblément, il semble que ce soit un sac de bled qui soit deschargé a terre. Posture droicte. [IMAGE] Posture gaulche. [IMAGE] CAPRIOL. J'ay remarqué, qu'en tous ces mouvements cy devant mentionnez, il y a tousjours l'un des pieds, ou tous les deux a terre. ARBEAU. Vous dictes vray: Et certainement ceux qui n'ont qu'un pied a terre, sont plus gaillards: Mais il y a un mouvement appellé sault, qui se fait quand les deux pieds sont hors de terre eslevez en l'air, qui est encor plus gaillard: Et debvez entendre qu'il est deux sortes de saultz, sçavoir sault majeur, & petit sault: Quand au petit sault, il fait partie & portion des mouvements, & n'a point de notte en la tabulature qui le designe. CAPRIOL. Je n'entends point ce que vous dictes. ARBEAU. Imaginez, que vous soyez les pieds joints. Si la tabulature vous commande de faire une greve droicte, comment feriez vous? CAPRIOL. Je laisserois mon corps sur le pied gaulche, & esleverois le pied droit en l'air en devant. ARBEAU. La greve droicte seroit passable ainsi, mais elle ne seroit pas gaillarde, cest pourquoy en lieu de laisser le gaulche à terre, il le fault poser de nouveau: Et pour ce faire, il est necessaire de faire un petit sault sur ledit pied gaulche: Et en mesme instant faire la greve du pied droict: Quoy faisant, vous entendez assez que ledit sault est comme je vous disois, partie dudit mouvement de greve. Et ainsi fault user dudit petit sault en tous les aultres pas & mouvements ou l'un des pieds s'esleve en l'air, & aussi si vous y prenez garde, je vous ay dit qu'il failloit getter & poser les pieds: Pour ceste cause, quand je vous donneray par escript la tabulature de la gaillarde, je taiseray ledit petit sault, & vous escriray seullement lesdits pas & mouvements, d'aultant qu'il y est subentendu & comprins. CAPRIOL. Qu'est ce que le grand sault? ARBEAU. Cest un mouvement à part, qui precede la cadànce, & sera notté & nombré en la tabulature de gaillarde par un souspir, qui tient place de l'une des six minimes blanches des mesures ternaires, desquelles consiste la gaillarde, tellement que ledit grand sault equipole en duration de temps à l'un des aultres cinq pas ou mouvements. CAPRIOL. Pour faire donc les mesures du temps necessaires aux cinq pas, il fault faire quatre mouvements, puis un sault majeur, puis la posture. ARBEAU. Cela est vray, quand on faict cadance, que les musiciens appellent Clausulam, & se treuvent plusieurs danceurs si agiles, qu'en faisant ledit sault majeur, ilz remuent les pieds en l'air, & tel remuement est appellé capriole, comme voyez en ceste figure cy dessoubz: Mais il la fault faire si dextrement, qu'elle convienne justement à la posture, qui suyt ordinairement le sault majeur pour faire ladicte cadance. CAPRIOLE [IMAGE] CAPRIOL. J'apprendray voluntiers ceste capriole puis qu'elle porte mon nom: Mais qu'appellez vous cadance. ARBEAU. Cadance n'est aultre chose qu'un sault majeur suivy d'une posture: Et comme vous voyez qu'és chansons musicales, les joueurs d'instruments ayans joué l'accord penultime, se taisent un peu de temps: Puis jouent le dernier accord pour faire fin doulce & harmonieuse, ainsi le sault majeur qui est quasi comme un silence des pieds & cessation de mouvements est cause que la posture qui le suyt ha meilleur grace, & se treuve plus aggreable: Oultre ce, vous pouvez entendre, que si le danceur ne faisoit ce sault, il fauldroit qu'à chacune des six minimes blanches de la gaillarde, il fist mouvement, qui seroient en nombre six, & ainsi retumberoit sa cadance tousjours sur un mesme cousté: Ce qui n'advient pas, a cause dudit sault, qui fait que les mouvments & pas sont impairs, & consequemment la cadance tumbe d'un cousté, puis aprez d'un aultre. CAPRIOL. Quel inconvenient si la cadance tumboit tousjours d'un cousté? ARBEAU. Sçavez vous pas bien que la varieté delecte: Et que mesme chose repetee est odieuse, tesmoing Ladage commun, Crambe repetita: Et le vers d'Horace si souvent allegué: Ridetur chorda qui semper oberrat eadem. CAPRIOL. Fait-on ceste cadance tousjours sur la sixiesme minime blanche? ARBEAU. Ordinairement, & le plus souvent, vray est qu'il y a quelques adnotations a faire: Mais je vous en parleray quand il viendra à propos, dont je vous en diray presentement ceste cy, qui est que le danceur faict six assiettes & mouvements de pieds sur toutes les six nottes, & passe & dilaye la cadance, jusques à la dixhuictiesme notte, & fait un souspir pour le sault majeur sur la dixseptiesme notte, & ainsi demeure ledit passage de dixsept pas, le danceur peult encor passer la cadance & la dilayer, jusques à la vingt-quatriesme, ou trentiesme ou trentesixieme notte: Et ainsi consequemment, faisant passages de vingt trois, vingt neuf, & trente cinq pas: Mais je ne vous conseille point d'en user, parce que les spectateurs se pourroient ennuyer d'attendre trop long temps ladicte cadance, & auroient opinion que fussiez hors de cervelle: Et à la verité la memoire se pourroit troubler en passages si longs. CAPRIOL. Sont-ce la tous les pas, assiettes, & mouvements desquels on use en la gaillarde? ARBEAU. Ce sont ceulx qui pour le present me sont venuz en memoire: Si en regardant les bons baladins vous prenez garde qu'ils en facent d'aultres, vous les mettrez en escript, & leur donnerez tel nom que bon vous semblera. CAPRIOL. Me voila tenant une Damoiselle par la main, ma reverence faicte, mon chappeau remis, & en contenance decente, par quel bout me fauldra-il commencer? ARBEAU. Vous ferez vos pas & mouvements selon la tabulature que vous aurez mise en memoire: Mais je vous conseillerois d'y estre modeste, cest à dire de dancer par terre, garder les cinq pas doulcement, comme si vous danciez le tourdion, & oultre ce, de faire un tour de salle tenant tousjours vostre Damoiselle, puis quand vous serez en train prenant congé d'elle, la laisserez dancer à part, & commencerez à dancer vos cinq pas plus hault, jusques à ce que vous serez au devant d'elle: Et alors avec gaillardise ferez tels passages que bon vous semblera: Car si d'entree vous saultiez trop gaillardement il sembleroit que voulsissiez rompre (comme on dit) l'andouille au genoil. CAPRIOL. J'en ay veu maintes lesquels demeurent assez long temps, en se guindant le corps auparavant que de marcher & dancer. ARBEAU. Je ne prise pas ceste façon, parce qu'ilz se rendent subgects à ce que leur obgecte le Poëte. Quid dignum tanto feret hic promissor hiatu. CAPRIOL. Donnez moy en premier lieu l'air d'un tourdion, puis vous me donnerez l'air de la gaillarde. ARBEAU. L'air du tourdion & l'air d'une gaillarde sont de mesmes, & ny a difference sinon que le tourdion se dance bas & par terre d'une mesure legiere & concitee: Et la gaillarde se dance hault d'une mesure plus lente & pesante: Tandiz vous faictes bien de demander l'air d'un tourdion: Car quand les airs sont cogneuz par le danceur, & qu'il les chante en son coeur avec le joueur d'instrument, il ne peult faillir à les bien dancer: Vous prendrez donc l'air qui s'ensuyt pour tous les aultres tourdions, dont il en y a des diversitez innumerables. [PARTITION] CAPRIOL. Je comprends bien cest air: Mais je ny apperçois point les cadances dont m'avez parlé. ARBEAU. Je vous ay distingué par bastons & lignes perpendiculaires les limites des cadances, lesquelles vous pouvez de vous mesmes reduire ainsi. [PARTITION] CAPRIOL. je le comprends bien mieulx que je ne faisois, ne me reste qu'à sçavoir quels mouvements je mettray en oeuvre. ARBEAU. Faictes pied en l'air gaulche durant la premiere minime blanche, pour le premier pas. Puis pied en l'air droict sur la seconde minime blanche, pour le deuxiesme pas. Puis pied en l'air gaulche sur la troisiesme minime blanche pour le troisiesme pas. Puis pied en l'air droict sur la quatriesme minime blanche pour le quatriesme pas. Sur le souspir qui tient place d'une minime blanche, faictes un sault moyen, consideré que cest un tourdion que vous dancez. Sur la derniere minime blanche, faictes une posture gaulche pour le cinquiesme pas. Continuant vostre tourdion, changez & faictes à droict ce que vous aurez fait a gaulche, & a gaulche ce que vous aurez fait a droict, sçavoir: Pied en l'air droict sur la premiere minime blanche pour le premier pas Puis pied en l'air gaulche sur la seconde minime blanche pour le second pas. Puis pied en l'air droict sur la troisiesme minime blanche pour le troisieme pas. Puis pied en l'air gauche sur la quatrieme minime blanche pour le quatrieme pas. Sur le souspir qui tient place d'une minime blanche, faictes le sault majeur, qui precede la posture: Mais vous ferez ledit sault mediocre, attendu que dancez le tourdion & non la gaillarde. Sur la derniere minime blanche, faictes une posture droicte pour le cinquieme pas. Et ainsi continuez tant que le joueur d'instrument continuera de jouer, de permuter & tumber reciproquement en cadance, à l'une des fois en posture gaulche, & l'aultre fois en posture droicte: Et affin que le tout vous soit plus facile à concevoir, je vous feray icy une tabulature de ce que je vous viens de dire, qui vous representera le tout en un clin d'oeil. Car je vous mettray encor par escript l'air de ce tourdion, & audroict de chaque notte, je vous donneray par escript lesdits pas & mouvements: Et me delibere d'en faire de mesme l'air d'une gaillarde: Ladicte tabulature vous servira pour toutes les aultres gaillardes, qui sont aussi innumerables. CAPRIOL. Aprez que le joueur d'instrument à finy le tourdion. fault-il pas faire une reverence salutatoire pour prendre congé de la Damoiselle. ARBEAU. Ouy, & la fault doulcement restituer en la place ou lavez prinse, en la remerciant de l'honneur qu'elle vous a faict. Tabulature pour dancer le tourdion incontinent aprez le retour de la basse-dance. [TABLE] Les mouvements de marque-pied & de marque talon se font assez doulcement, & les pourriez mettre en usage en lieu des pieds en l'air ainsi. [TABLE] CAPRIOL. Je treuve fascheuse ses reductions en cadances: Seroit-ce pas tout un de partir le tourdion par bastons, lesquels enfermeroient deux mesures ternaires, & faire sur la derniere mesure un pas, un sault majeur, & une posture: ARBEAU. Tout reviendroit à un: Et ne vous avois proposé ladicte reduction sinon pour vous enseigner plus clairement voz cinq pas: Je n'useray donc plus de reduction: Et laisseray en la tabulature l'air de la gaillarde en sa forme, sans y riens reduyre: Seullement souvenez vous d'employer les pas selon les mesures du temps que l'air monstrera en leur marge: Et jugez que sera cadance semblable des mesures escriptes & nottees cy dessoubz, desquelles la troisiesme est reduicte. [PARTITION] CAPRIOL. La deuxieme mesure du ternaire que vous appellez cadance, ne peult elle estre d'aultre musique, que de l'une de-ces trois qu'avez icy nottees. ARBEAU. Elle peult estre de plusieurs aultres sortes, telles qu'il plait au compositeur, & que l'air de la gaillarde le requiert: Et fault necessairement que ladicte deuxieme mesure face cadance, ou qu'elle passe sans cadance jusques à la quatrieme mesure, que nous avons dit estre passage d'unze pas, ou jusques à la sixieme mesure, que nous avons dit estre passage de dixsept pas. CAPRIOL. Il est temps que me donniez la tabulature des pas de la gaillarde. ARBEAU. Il est de tant de gaillardes par escript, que je ne sçay laquelle choisir pour commencer & y prendre pied: Du commencement que j'apprins à dancer à Poictiers, nostre maistre en sonnoit une qu'il appelloit La traditore my fa morire, de laquelle l'air estoit tenu des plus beaulx entre toutes les aultres gaillardes: Je la vous veulx icy notter en musique. Air de la gaillarde appellee, La traditore my fa morire. [PARTITION] CAPRIOL. Je tiens ceste air merveilleusement aggreable: A Orleans quant nous donnions des aulbades, nous avions tousjours sur noz Lutz & Guiternez la gaillarde appellee la Romanesque: Mais je la treuvois trop frequentee & triviale: J'en apprins une sur le Luth que je voyois volontiers dancer par mes compaignons, par ce que je la sçavois jouer & chanter, & aussi qu'il me sembloit que les pas y estoient bien marquez, par ceulx qui la dançoient: Elle se nomme Anthoinette: La voicy en musique. Air de la gaillarde appellee Anthoinette. [PARTITION] ARBEAU. Vrayement l'air de ceste gaillarde Anthoinette est gaillard: Et puis que l'avez en main, nous le prendrons pour en faire le premier pied & fondement de la tabulature des pas & mouvements de la gaillarde. CAPRIOL. Puis que tous les airs des gaillardes se rapportent, ce me sera tout un si vous prenez pied sur la gaillarde Anthoinette, ou sur telle aultre que bon vous semblera. ARBEAU. Je commenceray par vostre gaillarde ma tabulature: Puis je vous en donneray d'aultres, pesle mesle, selon qu'elles me viendront en memoire. Tabulature des cinq pas de la gaillarde, de la quelle les mouvements sont comme au tourdion, fors qu'ils sont faicts plus hault & plus virilement, & en lieu du pied en l'air, le danceur fera des coups de pied ou greves. [TABLE] Aultres cinq pas. [TABLE] Aultres cinq pas. [TABLE] CAPRIOL. Pourquoy avez vous commandé une posture droicte sans petit sault sur la deuxieme minime blanche pour le deuxieme pas? ARBEAU. Il fault conjecturer que les danceurs l'ont treuvé ainsi de meilleur grace pour apporter quelque variation delectable, & d'avantage aulcuns en lieu de mettre pour ladite posture les deux semelles à terre, ilz se soustiennent sur le talon du pied devant, & tiennent le genoil dudit pied roide & non lié, disans qu'il à meilleur grace [TABLE] Aultre cinq pas. [TABLE] Vous pourrez mettre és cinq pas cy dessus, en lieu des pieds joincts des postures. & encore faire lesdites postures non en avant, mais de cousté comme si c'estoit un pied largy. CAPRIOL. Vous commandez de continuer en repetant le commencement: Ainsi faisant on ne feroit qu'une sorte de conq pas en une gaillarde. ARBEAU. Cela se remettra à la volunté du danceur, car s'il veult, en lieu de repeter comme au commencement, il mettra en avant une sorte nouvelle de cinq pas, & ne sçauroit estre que bon d'ainsi le faire, pourveu toutesfois qu'il ayt fait le revers de ses premiers cinq pas: Et si le danceur se treuve pressé, & avoit faulte de place, qu'il ne puisse marcher tout droit, il pourra dancer lesdits cinq pas en ronde, & en tornant son corps tascher à se retreuver planté devant sa Damoiselle. CAPRIOL. Fauldra-il que je dance mes cinq pas allant tout droit, quand la place y sera? ARBEAU. Quand je parle d'aller tout droit, j'entends de ne point torner le corps entierement, car sera dancer d'une bonne grace si vous tornez maintenant le cousté droit, maintenant le cousté gaulche devers la Damoiselle, comme si vous vouliez escrimer: La greve droicte desire de monstrer le cousté droit, & la greve gaulche desire de monstrer le cousté gaulche. CAPRIOL. Il m'est advis que par les meslanges des mouvements divers que m'avez figurez, je composerois bien des cinq pas à ma phantaisie. ARBEAU. Faire le pourriez certainement: Mais il fault que nottiez qu'il y a des cinq pas appellez cinq pas, parce qu'ils sont mesurez par les mesmes mesures du temps que les cinq pas sont mesurez: Et neantmoins ont plus ou moins de cinq mouvements. Et ceste consideration provient des mesures extendues ou racoursies: Car puis qu'il y a deux mesures ternaires en une cadance, & que lesdites deux mesures tiennent six minimes blanches, dont l'une est convertie en un souspir, restans quatre avec la posture, ils s'ensuyt bien que si on coupe les quatre premieres chacune en deux, seront huict noires en lieu de quatre blanches, & en adaptant à chacune noire son mouvement, il y aura (avant la posture) huict pas en lieu de quatre, & en tout la posture comprise seront neuf pas. [TABLE] Voyez vous pas cy dessus, que les pieds joincts ou greve droicte tiennent aultant de temps que trois minimes blanches? & le sault majeur avec la posture contiennent le reste du temps, & pour y parvenir, la quatrieme minime blanche est convertie en souspir, & anticipee pour faire le sault majeur. Aultre cinq pas de trois mouvements. [TABLE] Considerez surce que dessus, que la greve tient deux minimes blanches, l'entretaille faisant greve, tient deux aultres minimes blanches, le sault majeur tient le souspir, equipolent à une minime blanche, & la posture le temps d'une aultre minime blanche: Et ainsi tous lesdits cinq pas sont reduits & racoursiz à trois pas, equipolents à cinq. Aultres cinq pas racoursiz. [TABLE] Aultres cinq pas racoursiz. [TABLE] CAPRIOL. Vous me debvez donner exemple d'une cadance contenant plus de cinq pas de mouvements. ARBEAU. Il en est d'une infinité de sortes que vous practiquerez & apprendrez de ceulx de vostre aage, recevez pour le present les sept pas qui s'ensuyvent, qui sont equipolents, & qui se reduysent aux deux mesures ternaires des cinq pas, parce que comme voyez en marge les premiere & troisieme minimes blanches, lesquelles ne debvroient faire chacune qu'un pas, font chacune deux pas marquez en la tabulature par deux minimes noires: Et notterez que deux minimes noires & une blanche, sur lesquelles le danceur fait deux pieds en l'air & une greve sans petit sault, s'appellent fleuret, tellement que deux fleurets, un sault majeur, & une posture font les cinq pas. [TABLE] Dernierement je fuz de nopces, ou jevis faire cinq pas à un jeusne homme qui me semblarent de bonne grace: Il les dançoit ainsi: [TABLE] Vous notterez que ces cinq pas augmenteront leur grace, si vous les faictes mignardez. CAPRIOL. Qu'appellez vous pas mignardez? ARBEAU. Vous ferez les pas mignardez, quand extendrez les cinq minimes blanches en dix minimes noires, & qu'en lieu de faire un pas, en mesme instant, avec son petit sault, vous en ferez deux morceaux, anticipant un peu ledit petit sault sur la premiere minime noire, & incontinent aprés faisant le pas sur la deuxieme minime noire: Et telles façons de pas mignardez ne sont à la verité que les cinq pas, mais ils ont meilleur grace & sont moins lourds, car en lieu de tumber le corps à plomb d'un coup, on l'assiet en traisnant. CAPRIOL. S'il advenoit que la musique ne continst que des minimes blanches, y pourroit-on adapter des fleurets? ARBEAU. Ouy certes, car ymaginant la derniere minime blanche estre couppee en deux noires, des deux premiers pas, vous en feriez trois, & faisant le semblable de la troisieme minime blanche, augmenteriez d'un pas, & ainsi vostre cadance contiendroit sept pas & mouvements, comme si la musique y estoit nottee, & ainsi ymaginerez telles recouppes que bon vous semblera, & y appliquerez ou moins ou plus de pas, comme verrez bon estre. CAPRIOL. Le sault majeur & la posture tiennent le temps de deux minimes blanches. En faisant deux minimes noires du souspir, j'en pourrois donc faire encore un fleuret, & par ainsi les deux mesures ternaires seroient accomplies par trois fleurets. ARBEAU. Vous avez raison. Mais il n y auroit plus de cadance, & fauldroit faire la cadance sur la quatrieme mesure, & cela s'appelleroit faire un passage, parce que passeriez une cadance pour l'aller chercher plus avant: Et supposé que fissiez aux deux mesures suyvants deux fleurets & une posture. vostre passage en tout contiendroit seize pas, à sçavoir neuf pas pour les trois premiers fleurets, & sept pas pour les deux fleurets, sault majeur & posture de la cadance, en tout seize pas. Et si vous vouliez encor passer & differer vostre cadance jusques à la sixieme mesure ternaire, vostre passage seroit de vingt cinq pas & mouvements. CAPRIOL. Vous m'avez cy devant dit que le premier passage apréz les cinq pas, se fait d'unze pas sur la quatrieme mesure, & de dixsept sur la sixieme mesure. & de vingt trois sur la huictiesme mesure, & ainsi consequemment comptant six pas pour les deux mesures que l'on passe, & cinq pas pour deux mesures, ou l'on faict cadance. ARBEAU. Je le vous ay dit ainsi: Mais cela s'entend quand on dance un pas sur chacune minime blanche: Or est augmenté le nombre des pas, quand nous couppons une minime blanche en deux noires, & que sur chacune minime noire, nous voulons attribuer son pas: Quand aussi les passages sont moindres d'unze, dixsept, vingt trois pas, & quand nous faisons servir deux ou trois minimes blanches à un seul pas, vous vous souviendrez de ce que je vous ay dit, que l'action du danceur est belle, quand le mouvement des pieds accompaigne les battements de la musique, comme vous experimenterez en l'air de la gaillarde appellee la Milannoise que voyez cy dessoubs composee d'un passage d'unze pas extenduz en quinze par cinq fleurets, suyvis de cinq pas racoursis en trois pas. CAPRIOL. Peult-on pas faire des fleurets en dançant la gaillarde, encore que la musique ne porte point de minime blanche couppee en deux minimes noires. ARBEAU. Aiseement, en ymaginant ladicte section, encor qu'elle ne soit pas ainsi nottee, & generalement pourrez, ou par escript, ou par ymagination former voz mesures, de nottes entieres ou couppees telles que vouldrez. CAPRIOL. J'attends l'air de ceste Milannoise, & la tabulature des pas & mouvements qu'il y convient adapter. ARBEAU. [TABLE] CAPRIOL. Passons oultre, & me donnez la tabulature de quelque passage d'unze pas. ARBEAU. Les passages d'unze pas pouvent estre formez en comptant & liant ensemble deux cadances de cinq pas, ou equipolents à cinq pas, telles que vouldrez choisir, pourveu qu'en lieu du souspir (sur lequel se fait le sault majeur de la premiere cadance) vous y colloquiez un mouvement, ou bien que convertissiez ledit souspir & la posture suyvante en un fleuret, ou deux pas pour rompre ladicte premiere cadance, & si ne voulez prendre ceste peine, vous vous ayderez de la tabulature suyvante, en attendant qu'en ayez recueillé d'aultres des bons baladins, car l'usage vous en apprendra plus que les preceptes: Et notterez que ces passages d'unze ou plusieurs pas, sont naturellement propres pour les fins des gaillardes, & de meilleur grace, quand on les fait en tornant le corps. [TABLE] Il vous fauldra torner deux fois le corps en dançant les unze pas, & aultant de fois en dançant le revers, car un seul tornement de corps ny suffiroit pas. Aultre passage d'unze pas. [TABLE] Aultre passage d'unze pas. [TABLE] CAPRIOL. Jay (Dieu mercy) assez dequoy m'exercer maintenant en la gaillarde: Toutesfois je vous prie me donner encore une couple de passages, s'il ne vous ennuye. Aultre passage d'unze pas. [TABLE] Aultre passage d'unze pas, la où le sixieme pas est decoupé en deux & le septieme aussi, tellement qu'il y a treize pas pour unze. [TABLE] Pour faire des passages de dixsept pas, il vous fault lier ensemble trois cadances de cinq pas, & rompre les deux premieres: Ou bien liez ensemble un passage d'unze pas avec une cadance de cinq pas, & rompez les cadances, gardant seullement la derniere: Pour faire des passages de vingt trois pas, fault lier ensemble quatre cadances de cinq pas, ou deux passages d'unze pas, & rompre toutes les cadances, fors la derniere: Et ainsi consequemment. CAPRIOL. Cela est bien facile: Jugez si je feray bien ce premier passage d'unze pas. ARBEAU. Vous avez bien formé vos pas & mouvements, & estes bien tumbé en cadance, mais quand vous dancerez en compagnie ne baissez point la teste pour contrerooller voz pas & veoir si vous dancez bien: Ayez la teste & le corps droit, la vheue asseuree, crachez & mouchez peu, & si la necessité vous y contrainct, tornés le visage d'aultre part & usez d'un beau mouchoir blanc: Devisés gracieusement, & d'une parole doulce & honneste, vos mains soient pendants, non comme mortes, ny aussi pleines de gesticulations, & soyés habillé proprement & nettement, avec la chausse bien tiree, & l'escarpin propre. & vous souvenés de ces advertissements, non seullement en ceste dance gaillarde, mais aussi en toutes aultres sortes de dances. Nous avons assés parlé de la gaillarde, & n'en parleray d'avantage, sinon pour vous dire que pouvez maintenant cognoistre estre facile de decouper le double d'une pavane, en l'extendant par tels mouvements que vouldrez choisir, lesquels seront mesurez par six minimes blanches, un souspir pour le sault majeur & une posture, ou par douze minimes noires, un souspir pour le sault majeur & une posture. Ou par extensions & racourcissements de leurs meslanges, comprenants la mesure du temps que l'on mettroit à former le double que voulés decouper. Il s'est treuvé des personnes si gaillards & si bondissants, qu'ils ont accomodé & approprié plusieurs saults en l'air, & quelquesfois doublé ou triplé lesdits saults, en lieu des cinq pas ou unze pas, & à la fin desdits saults, sont retumbés à la cadance, si bien & proprement qu'ils ont acquis le renom d'estre des plus braves danceurs: Mais il est advenu maintes fois qu'en faisant les souples saults, ils se sont laissez tumber, dont la mocquerie & les risees s'en sont ensuyvies, parquoy les sages ont tousjours conseillé de ne faire tels saults, ou bien de les faire si aisez, que le danceur n'en puisse tumber en cest inconvenient. CAPRIOL. Ce m'est chose maintenant bien claire à entendre: Au reste je serois bien content de ne point ignorer la volte, puisque le temps la receue en usage. LA VOLTE ARBEAU. La Volte est une espece de gaillarde familiere aux Provençaulx, laquelle se dance comme le tourdion par mesure ternaire: Les mouvements & pas de ceste dance, se font en tornant le corps, & consistent en deux pas, un souspir pour le sault majeur, une assiette de pieds joincts, & en fin deux souspirs ou pauses. Pour entendre ce que dessus: Soiez par ypothese de front devant moy à pieds joincts, faites pour le premier pas un pied en l'air assez court, en saultant sur vostre pied gaulche, & en ce faisant me monstrerez vostre espaule gaulche, puis faites le deuxieme pas assez long sur vostre pied droit sans saulter, & en ce faisant me monstrerez vostre doz: Puis faites le sault majeur en tornant vostre corps & tumbés à pieds joints, quoy faisant me monstrerez vostre espaule droicte: Ainsi aurez accomply le premier tour. CAPRIOL. A vostre compte, on ne torne pas tout le corps. ARBEAU. Qui torneroit tout le corps, on se retrouveroit comme au commencement, & ne bougeroit-on quasi d'une place: Aprés ce premier tour (qui est de trois quartiers du corps) vous ferés au second tour un pied en l'air pour le premier pas assés court, comme auparavant, en saultant sur vostre pied gaulche, & en ce faisant me monstrerez vostre estomac: Puis ferez le deuxieme pas assez long sur vostre pied droit sans saulter, & ce faisant me monstrerez vostre espaule gaulche: Puis ferés le sault majeur en tornant vostre corps, & tumberés en pieds joincts, quoy faisant me monstrerés le dos. Pour le troisieme tour & cadance, ferés pied en l'air pour le premier pas assez court, en saultant sur vostre pied gaulche, & en ce faisant me monstrerés le cousté droit: Puis ferés le deuxieme pas assez long sur vostre pied droit sans saulter, ce faisant me monstrerez l'estomac: Puis ferés le sault majeur en tornant vostre corps & tumberez en pied joints, quoy faisant me monstrerés vostre espaule gaulche. Pour le quatrieme tour & cadance, ferés pied en l'air pour le premier pas assés court, en saultant sur vostre pied gaulche, & en ce faisant me monstrerés le dos: Puis ferés le deuxieme pas assés long sur le pied droit sans saulter, ce faisant me monstrerés l'espaule droicte: Puis ferés le sault majeur en tornant vostre corps, & tumberés en pieds joincts, quoy faisant me monstrerés l'estomac, comme vous esties planté au commencement: Et partant voiés qu'en quatre cadances, vous pouvés revenir au mesme lieu & en mesme aspect que vous estiés au commencement: Ce n'est pas toutesfois une necessité que je vous prescris, car il pourra advenir que tournerés plus ou moins vitte: Mais je vous ay fait ceste hypothese pour plus claire intelligence. CAPRIOL. Si je tiens une damoiselle par la main, il seroit impossible qu'elle fit le tour avec moy, d'aultant qu'elle est plus esloignee du centre. ARBEAU. Vostre argument est bon, supposé (comme il est vray) que la damoiselle fait les mesmes pas & mouvements que vous: Et pour ceste occasion, celuy qui dance la volte se contemplant estre comme le centre & meillieu d'un cercle, doit approcher de són corps la damoiselle le plus qu'il luy est possible quand il veult torner, car par ce moyen ladite damoiselle treuvera les pas moins spacieux & plus aisez à faire: Pour l'approcher de vous ferés ainsi que s'ensuyt. Aprés vostre reverence faite (tenant la damoiselle par la main) avant que de tourner faites quelques pas par la salle, par maniere de preparation, comme si vous danciez le tourdion: Or en cest endroit notterez qu'aulcuns dancent ce commencement par cinq pas a droit, puis cinq pas à gaulche faits à rechange, ou bien par cinq pas racoursis en deux pas, un sault majeur & une posture, & aultant pour le revers, & ainsi continuant: Aultres dancent ce commencement ainsi que le reste de la volte par un pied en l'air, un pas, un sault majeur, & la posture de pieds joincts, comme dessus a esté dit. CAPRIOL. Laquelle sorte vous aggrée le plus? ARBEAU. La derniere sorte: Car par ce moyen ceste dance demeure uniforme en toutes ses parties, tant au commencement qu'à la fin: Quand vouldrez torner, laissés libre la main gaulche de la damoiselle, & gettés vostre bras gaulche sur son dos, en la prenant & serrant de vostre main gaulche par le faulx du corps au dessus de sa hanche droicte, & en mesme instant getterez vostre main droicte au dessoubz de son busq pour l'ayder à saulter quand la pousserez devant vous avec vostre cuisse gaulche. Elle de sa part, mettra sa main droicte sur vostre dos ou sur vostre collet, & mettra sa main gaulche sur sa cuisse pour tenir ferme sa cotte ou sa robbe, affin que cueillant le vent, elle ne monstre sa chemise ou sa cuisse nue: Ce fait vous ferez par ensemble les tours de la volte, comme cy dessus a esté dit: Et aprés avoir tournoyé par tant de cadances qu'il vous plaira, restituerez la damoiselle en sa place, ou elle sentira (quelque bonne contenance qu'elle face) son cerveau esbranlé, plain de vertigues & tornoyements de teste, & vous n'en aurez peult estre pas moins: Je vous laisse à considerer si cest chose bien seante à une jeusne fille de faire de grands pas & ouvertures de jambes: Et si en ceste volte l'honneur & la santé y sont pas hazardez & interessez. Je vous en ay desja dit mon opinion. CAPRIOL. Ce vertigues & tornoiements de cerveau me fascheroient. ARBEAU. Dancez donc quelque aultre sorte de dance: Ou si vous dancez cest cy à la gaulche, recommencez une aultre fois de la dancer à la main droicte, & par ainsi redetornerez à la secunde fois, ce que vous aurez tórné à la premiere. [TABLE] Vous continuerez à torner par cadances à la gaulche, tant qu'il vous plaira: Et si voulez à une aultre fois dancer la volte à main droicte, vous fauldra mettre vostre main droicte sur le doz de la Damposelle, & la main gaulche soubz son busq. & en la poussant de la cuisse droicte soubz la fesse, torner le revers de la tabulature cy dessus: Et nottez qu'il y a dexterité à empoigner & serrer contre vous la Damposelle, car il fault ce faire en deux mesures ternaires, desmarchant sur la premiere mesure pour vous planter devant elle, & sur la fin de la deuxieme mesure, luy mettant l'une des mains sur la hanche, & l'aultre soubs le busq, pour a la troisieme mesure commencer à torner selon les pas contenus en la tabulature. CAPRIOL. La courante comment la fault-il dancer, est-elle bien differente de la volte? LA COURANTE. ARBEAU. Elle differe beaucoup de la volte, & se dance par une mesure binaire legiere, consistant de deux simples & un double du cousté gaulche, & aultant du cousté droict, en marchant tousjours en avant ou de cousté, & quelquesfois en retrogradant selon qu'il plait au danceur: Et notterez qu'il fault saulter les pas de la Courante, ce qui ne se faict pas en la Pavane, ny en la Basse-dance: Pour faire donc un simple à gaulche en la Courante, vous qui estes en contenance decente, saulterez sur le pied droict, en asseant le pied gaulche pour vostre premier pas, puis saulterez sur le pied droict, en tumbant en pied joinct pour le second pas, & ainsi sera accomply le simple à gaulche: Aultant en ferez à revers, pour accomplir le simple à droict: Pour le double à gaulche, saulterez sur le pied droict, en asseant le pied gaulche pour le premier pas dudit double à gaulche, puis saulterez sur le pied gaulche, en faisant le second pas du pied droict, puis saulterez sur le pied droict, en faisant le troisieme pas du pied gaulche: Puis saulterez sur le pied droict, en faisant le quatrieme pas à pied joinct: Et ainsi sera accomply le double a gaulche: Aultant en ferez à revers pour les deux simples & double à droit: De mon jeusne aage ils dressoient sur la Courante une forme de jeu & ballet: Car trois jeusnes hommes choisissoient trois jeunes filles: Et s'estants mis en renc, le premier danceur avec sa damoiselle la menoit en fin sister à l'aultre bout de la salle, & retornoit seul avec ses compaignons, le deuxieme en faisoit de mesme, puis le troisieme, tellement que les trois filles demeuroient separees à l'un des bouts de la salle, & les trois jeusnes hommes de l'aultre: Et quant le troisieme estoit de retour, le premier alloit en se gambadant & faisant plusieurs mines & contenances d'amoureux, comme espoussetant & guindant ses chausses, tirant sa chemise bien a propos, alloit (disje) requerir sa damoiselle, laquelle luy faisoit reffus de la main. ou luy tornoit le doz, quoy voyant, le jeusne homme s'en retornoit en sa place, faisant contenance d'estre desesperé: Les deux aultres en faisoient aultant: En fin ils alloient tous trois ensemble requerir leursdites damoiselles chacun la sienne, en mettant le genoil à terre, & demandant mercy les mains joinctes: Lors lesdites damoiselles se rendoient entre leurs bras, & dançoient ladite courante pesle mesle. CAPRIOL. Dancent-ils pas les Courantes maintenant de ceste mesme façon? ARBEAU. Quand aux pas, ils doibvent estre de mesme: Mais les jeusnes hommes qui ne sçavent & n'ont point apris que cest d'un simple ny d'un double, dancent à leur phantaisie, & se contentent moyennant qu'ils retumbent en cadance, & en dançant tornent le corps, lachant la main à la damoiselle, & aprez le tour fait, tout en dançant repreignent ladite damoiselle par la main, & continuent: Et quand les compaignons de celuy qui dance voient qu'il est lassé, il viennent oster & derober la damoiselle, & la meinent dancer, ou bien luy en mettent en main une aultre quand ils voient que la premiere est lassee: Voicy une tabulature de la Courante. [TABLE] Vous en ferez aultant pour le revers, & continuerez en repetant comme au commencement: Aucunes des minimes blanches de la tabulature cy dessus, sont a vuide & pendant le temps d'icelles, ferés les petits saults qui accompaignent les mouvements, ou quand serez lassé & ne vouldrez saulter, elles vous serviront de souspirs, comme si elles y estoient reduictes. CAPRIOL. Quelle dance est l'Allemande? L'ALLEMANDE. ARBEAU. L'allemande est une dance plaine de mediocre gravité, familiere aux Allemands, & croy qu'elle soit de noz plus anciennes, car nous sommes descendus des Allemands: Vous la pourrez dancer en compagnie: Car ayant une damoiselle en main, plusieurs aultres se pourront planter derrier vous, chacun tenant la sienne, & dancerez tous ensemble, en marchant en avant, & quand on veult en retrogradant, par mesure binaire, trois pas & une greve, ou pied en l'air sans sault, & en quelques endroits par un pas & une greve, ou pied en l'air: Et quand vous aurez marché jusques au bout de la salle, pourrez dancer en tornant, sans lascher vostre damoiselle: Les aultres danceurs qui vous fuyvront en feront de mesme quand ils seront audit bout de la salle: Et quand les joueurs d'instruments cesseront ceste premiere partie, chacun s'arrestera & devisera avec sa damoiselle, & recommencerez comme au paravant pour la secunde partie: Et quand viendra à la troisieme partie, vous la dancerez par la mesme mesure binaire plus legiere & concitéé, & par les mesmes pas, en y adjoustant des petits saults comme à la Courante: Ceque vous entendrez facilement par la tabulature, laquelle ne seroit quasi point necessaire, attendu qu'il ny a guieres de diversitez de mouvements, toutesfois afin que vous voyez le tout plus clairement, je n'espargneray la peine de la vous donner par escript. [TABLE] Voyez en ces deux dernieres mesures, qu'il ny a qu'un pas & une greve en chacune, parce que l'air le requiert ainsi. [TABLE] Tabulature de la troisieme partie de l'Allemande, qui se dance par mesure binaire, comme la courante, avec les mouvements. [TABLE] Les minimes blanches qui sont icy a vuyde, tiennent lieu de souspirs & pauses, ou de petits saults, comme dit a esté en la Courante: En dançant l'Allemande, les jeunes hommes quelquesfois derobent les damoiselles, les ostant de la main de ceulx qui les meynent, & celuy qui est spolié se travaille d'en r'avoir une aultre: Mais je n'appreuve point ceste façon de faire, parce qu'elle peult engendrer des querelles & mescontentements. CAPRIOL. Je me suis prins garde qu'ez bonnes compagnies, on commence ordinairement les dances par branles. Dictes moy comment il les fault dancer? BRANLE DOUBLE. ARBEAU. Puis que vous sçavez bien dancer la Pavane & la Basse dance, il vous sera facile de dancer les branles a la mesme mesure binaire, & entendrez que les branles se dancent de cousté, & non pas en marchant en avant: En premier lieu, quand au branle appellé branle double, vous y marcherez un double du cousté gaulche puis un double du cousté droit, vous sçavez bien qu'un double consiste de trois pas, & un pied joinct: Pour faire lesquels de cousté, vous qui serez en contenance decente (aprez la reverence salutatoire) tenant ferme & posé le pied droit, getterez a cousté le pied gaulche, qui sera un pied largy pour la premiere mesure: Puis pour la secunde mesure (tenant ferme & posé le pied gaulche) approcherez le pied droit du gaulche, qui sera un pied largy, quasi joinct: Pour la troisieme mesure (tenant ferme & posé le pied droit) getterez à cousté le pied gaulche, qui sera un pied largy Et pour la quatrieme mesure (tenant ferme le pied gaulche) approcherez le pied droit prés dudit gaulche, qui sera pied joinct. Ces quatre pas faicts en quatre mesures ou battements de tabourin, nous les appellerons double à gaulche, aultant en ferez vous du cousté droit, en faisant le revers du double precedent: Cartenant ferme et posé le pied gaulche, getterez à cousté le pied droit, qui sera un pied largy, pour la cinquieme mesure: Puis pour la sixieme mesure (tenant ferme & posé le pied droit) approcherez le pied gaulche du droit, qui sera un pied largy, quasi joinct: Pour la septieme mesure (tenant ferme & posé le pied gaulche) getterez à cousté le pied droit, qui sera un pied largy: Finablement pour la huictiesme mesure (tenant ferme & posé le pied droit) approcherez le pied gaulche pres dudit droit, qui sera un pied joinct, & ces quatre derniers pas, nous les appellerons double à droit: Et ainsi en ces huict pas & mesures, sera accomply le branle double, comme verrez en la tabulature, et le repeterez comme au commencement, faisant un double a gaulche, puis un double a droit. CAPRIOL. Jay ouy là bas en vostre sallette maistre Guillaume avec son violon, donnez moy de la tabulature pour le branle double, & je la pratiqueray pour veoir si j'en viendray bien au bout. ARBEAU. Cela vient bien à propos: Descendons, & luy faisons sonner son violon: Les joueurs d'instruments sont tous accoustumez à commencer les dances en un festin par un branle double, qu'ils appellent le branle commun, & en aprez donnent le branle simple, puis aprez le branle gay, & à la fin les branles qu'ils appellent branles de Bourgoigne, lesquels aucuns appellent branles de Champaigne: La suyte de ces quatre sortes de branles est appropriee aux trois differences de personnes qui entrent en une dance: Les anciens dancent gravement les branles doubles & simples: Les jeusnes mariez dancent les branles gayz: Et les plus jeusnes comme vous dancent legierement les branles de Bourgoigne: Et neantmoins tous ceulx de la dance s'acquittent du tout comme ils peuvent, chacun selon son aage, & la disposition de sa dexterité. [IMAGE] Tabulature pour dancer les branles doubles. [TABLE] CAPRIOL. Ce branle double est bien facile à dancer: Mais il me semble que les danceurs ne bougent d'une place, d'aultant qu'ilz font a gaulche quatre pas, lesquels ils deffont a droit par aultres quatre pas. ARBEAU. Pour obvier à cela, ils font le double a droit plus restrainct, & ainsi gaignent tousjours avantage à la gaulche: En aulcuns lieux, en lieu dudit double a droict, ils font une reprise ou un branle. CAPRIOL. Les branles me plaisent parce que plusieurs y preignent plaisir ensemble. ARBEAU. Quand vous commencerez un branle, plusieurs aultres se joindront avec vous, tant jeusnes hommes que damoiselles: Et quelquesfois une qui est la derniere en la dance, prendra vostre main gaulche, & ainsi se fera une dance ronde. CAPRIOL. Celuy qui meyne le devant de la dance, quand il ny a point de ronde, demeure-il tousjours le premier? ARBEAU. Ouy bien souvent: Car il ne se treuve point d'aultre qui avec sa damoiselle veuille presumer d'aller le premier, mesmement quand cest un Seigneur de reputation, & sur lequel on ne veult pas entreprendre. CAPRIOL. Quelle place prendra cestuy cy qui vouldra estre de la partie? ARBEAU. Il se mettra à la queue, en prenant sa damoiselle par la main droicte, ou bien treuvera gracieusement quelque place entre ceulx qui sont en la dance. CAPRIOL. Feray je point de decoupements en dançant ces branles? ARBEAU. On a tousjours estimé, que le plus gravement & pesamment que l'on peult dancer les branles doubles, cest le meilleur, & toutesfois il n'est pas indecent de faire sur la premiere minime blanche de la septieme mesure un pied en l'air gaulche, & sur la seconde minime blanche de ladicte septieme mesure, un pied en l'air droit, & sur la premiere minime blanche de la huictieme & derniere mesure, un pied en l'air gaulche, prest à continuer & repeter comme au commencement, tenant ledit pied gaulche en l'air, aultant de temps que vault & emporte la derniere minime blanche. [TABLE] CAPRIOL. Ne faict on point d'aultres decoupements és branles doubles? ARBEAU. Les jeusnes hommes qui ont une grande agilité, y font des decoupements a leur plaisir: Mais je vous conseille de les dancer poseement. BRANLE SIMPLE. Soubz la mesme mesure binaire & par mesmes pas que je vous viens de proposer pour le branle double, vous dancerez le branle simple, faisant un double a la gaulche pour le commencement, mais voicy la difference: Car en lieu de faire aprez cela un double droit, ferez seullement un simple par un pied droit largy, & pour la fin le pied gaulche joinct, duquel simple decouperez les quatre minimes blanches, par trois pied en l'air & un souspir, comme nous venons de dire cy devant au branle double. Tabulature du branle simple. [TABLE] BRANLE GAY. Aprez le branle simple suyt le branle gay, lequel vous dancerez du cousté gaulche seullement, par deux mesures ternaires, en quatre pas & une pause: Pource faire, vous largirez le pied gaulche, & l'asseant a terre, ferez pied en l'air droit pour le premier pas, sur la premiere minime blanche: Puis vous approcherez le pied droit du gaulche, & l'asseant a terre, ferez pied en l'air gaulche pour le deuxieme pas, sur la deuxieme minime blanche: Puis largirez le pied gaulche, & en l'asseant a terre, ferez pied en l'air droit pour le troisieme pas, sur la troisieme minime blanche: Puis approcherez ledit pied droit prez du gaulche, & l'asseant a terre, ferez pied en l'air gaulche, & le tiendrez ainsi prest a repeter comme au commencement, pendant le temps de deux minimes blanches, qui seront equipolents a deux souspirs, ou une pause: Et si en l'air de la tabulature treuvez des semibreves, imaginez quelles soient couppees en deux minimes blanches, pour y asseoir les pas qu'il convient faire pour dancer le branle gay. Tabulature du branle gay. [TABLE] CAPRIOL. Ce branle (non sans cause) est appellé gay, car à ce que je voy l'un des pieds est tousjours en l'air: Mais poursuyvez, & parlez du branle que vous nommez branle de Bourgoigne. B. DE BOURGOIGNE. ARBEAU. Aprez le branle gay, les joueurs d'instruments sonnent le branle de Bourgoigne, lequel se dance de cousté & d'aultre, par mesmes pas que le branle double par mesure binaire, mais ladicte mesure est plus legiere & concitee: Et ny a difference esdits pas, sinon qu'en lieu des pieds joincts, on y fait des greves ou pieds en l'air, és quatrieme & huictieme pas: Tabulature du branle de Bourgoigne. [TABLE] B. DU HAULT BARROIS. Il y a une aultre sorte de branle appellé le hault Barrois, lequel se dance ainsi que le branle double, ou comme le branle de Bourgoigne: Mais il y a difference, parce que ce branle icy ne requiert pas seulement le mouvement des pieds, mais il requiert le mouvement des espaules & bras, avec petits saults, par mesure binaire, legiere & concitee: Pour le dancer, vous ferez ainsi, saulterez des deux pieds, en gaignant chemin du cousté gaulche, en tumbant sur pied largy gaulche: Puis saulterez encore des deux pieds, en gaignant chemin du cousté gaulche, & tumbant sur pied droit approché. Puis saulterez encore des deux pieds, gaignant chemin a gaulche, tumbant sur pied largy gaulche. Puis saulterez encore des deux pieds, en gaignant chemin a gaulche, tumbant sur pieds joincts, ou bien tumbant sur le pied gaulche, & faisant greve droicte, ou bien pied en l'air droit, & ainsi sera accomply le double a gaulche: Aultant en ferez a revers, du cousté droit, pour accomplir le double a droit: Et si l'air du hault Barrois est comme le branle simple, en retrancherez les deux penultimes mesures, pour accomplir ledit simple: Ce branle se dance par les vallets & chamberieres, & quelquesfois par les jeusnes hommes & damoiselles quand ils font quelques mascarades, desguisez en paysans & bergiers ou qu'ils se veullent esgayer priveement, La tabulature des branles double & simple escrits cy devant: vous debvroit suffire, si ne laisserayje a vous en donner une sur l'air d'un branle de Monstierandel. CAPRIOL. Ce branle icy me semble plus remuant que les precedents, & seroit propre pour dancer en l'hyver, afin de s'eschauffer: Puis que vous avez commencé a donner de la tabulature, je vous prie m'en donner pour ce branle icy. Tabulature du branle du hault Barrois. [TABLE] De tous les branles cy dessuz comme d'une source sont derivez & emannez certains branles composez, & entremeslez de doubles, de simples, de piedz en lair, de piedz joinctz & saultz quelquesfois variez par intercalation de mesures diverses, pesantes ou legieres, selon que bon a semblé aux compositeurs & inventeurs. Les joueurs distrumentz les appellent branles de Champagne couppez. Et affin de saccorder par ensemble, ils ont mis ces branles par suites de certains nombres, comme les nostres de Lengres en jouent dix de suitte, quilz appellent branles de Champagne couppez. Ilz en jouent un certain aultre nombre de suitte, qu'ilz appellent branles de Camp, une aultre suitte, ilz la nomment branles de Henault, une aultre suitte, ilz la nomment branles d'Avignon: Et aultant qu'il survient de fresches compositions & nouveaultez, aultant en font ilz de suittes, & leur attribuent des noms à plaisir. CAPRIOL. Donnés moy la tabulature de toutes ces suittes. ARBEAU. Je ne vous en donneray point de tabulature, vous remectant à en faire les memoires de vous mesmes, soubs les instructions des maistres joueurs d'instruments, ou de voz compaignons. Et quant serés instruict, & les vouldrés dancer en quelque festin, vous demanderez auldicts joueurs, la suitte que vouldrés dancer, par son nom, & ilz la vous donneront. Ce pendant je vous advertiray, que si voulés bien dancer ces branles couppés, il vous fault sçavoir les airs par coeur, & les chanter en vostre esprit avec le violon. CAPRIOL. Donnés men au moings la tabulature de deux ou trois, car par ce moyen j'auray plus facille entrée à l'intelligence de tous les aultres. ARBEAU. Je le veulx bien, voicy la tabulature des branles de Cassandre & Pinagay, premier & second de la suitte des branles de Champaigne couppés, qui se dancent par mesure binaire, legierement sans sault (comme aussi font ceulx de Camp, de Henault & d'Avignon) ou bien les dancerez comme les branles du hault barrois, avec petits saultz. Tabulature du branle couppé nommé Cassandre. [TABLE] Tabulature du branle couppé appellé Pinagay. [TABLE] CAPRIOL. Je croy que sçavez tous les mouvements des branles couppés. ARBEAU. Du commencement que je vins demeurer en ceste ville de Lengres, on ne parloit que dances, mascarades, & allegresses: Nous avions maistre Claudin qui jouoit divinement bien des instruments, & nous faisoit exercer gaillardement: Depuis quelque temps, je ny voy plus que du chagrin, avec cela je suis devenu vieil & pesant: Nous dancions lors entre aultres branles couppez, le branle de la Guerre, le branle d'Aridan, le branle de Charlotte, & une infinité d'aultres. CAPRIOL. Comment danciez vous ces branles que vous dictes? ARBEAU. Vous le verrez par leur tabulature. Tabulature du branle couppé Charlotte. [TABLE] Et continuerez en repetant comme au commencement: Et notterez que si vous le voulez dancer en forme de hault-barrois, vous fauldra faire des petits saults, ou voiez les minimes blanches a vuyde. Tabulature du branle couppé de la guerre. [TABLE] Tabulature du branle couppé appellé Aridan. [TABLE] En tornant le feuillet, vous treuverez la continuation de l'air & des mouvements de ce branle. [TABLE] Plusieurs branles preignent denomination des pays esquelz on les praticque ordinairement: Les Poictevins dancent leurs branles de Poictou: Les Escossois les branles d'Escosse: Les Bretons, les branles qu'ils appellent le Triory, ou passe pied. CAPRIOL. J'attens que m'en donniez les tabulatures. BRANLE DE POICTOU. ARBEAU. Aulcuns ignorans, ont corrompu les mouvements du branle de Poictou, lesquels je n'entends suyvre, & vous en donneray la tabulature, a la mode que je les ay aultresfois dancé avec les Bachelettes de Poictiers: Ce branle se dance par mesure ternaire, en allant tousjours a main gaulche, sans divertir a la droicte: Je ne vous en donneray que le commencement d'un air parce que le reste dudit air, & tous les aultres branles, dont il en y a grand nombre, ont mesmes mouvements. [TABLE] CAPRIOL. Ne faict-on point d'avantage de decoupements en ce branle de Poictou: Jay ouy dire que les Poictevines le decouppent, & en font un bruit gracieux de leurs sabots. ARBEAU. A la verité, elles le trepignent d'avantage sur les deuxieme & troisieme mesures ternaires, qui contiennent six minimes blanches, sur chacune desquelles elles font six pieds en l'air, a rechange, ainsi que voyez cy dessoubz. [TABLE] BRANLE D'ESCOSSE Les branles d'Escosse estoient en vogue y a environ vingt ans. Les joueurs en ont une suite de certain nombre de branles, differens de mouvements, que vous pourrez apprendre par l'instruction desdits joueurs, ou de vos compaignons: On les dance par mesure binaire legiere, comme voyez en la tabulature de ces deux branles suyvants, qui sont les premier & deuxieme de la suytte. Tabulature du branle d'Escosse. [TABLE] TRIORY DE BRETAGNE. Ce branle est peu ou point pratiqué par deça: S'il vous advient quelque jour de le dancer ce sera par mesure binaire legiere, ainsi que ceste tabulature vous le monstre: Je l'ay aultresfois appris a dancer d'un jeune Breton, lequel demeuroit avec moy escollier à Poictiers. CAPRIOL. Je seray bien ayse de sçavoir ce Triory: On ne peult que mieux valloir d'avoir l'intelligence de beaucoup de choses. Tabulature du branle appellé Triory. [TABLE] En lieu des trois pieds en l'air qui sont a la fin de ce Triory, vous vous tiendrez ferme sur les bouts de voz arteils, & remuant voz tallons joincts, en lieu du marque pied gaulche, remuerez vos deux tallons a droict, & en lieu du marque pied droit, remuerez voz deux talons à gaulche, & en lieu du dernier pied en l'air gaulche, remuerez voz talons a droit, en levant en mesme instant vostre pied gaulche en l'air, & affin que le voyez plus clairement à l'oeil, je vous donneray la tabulature des trois dernieres nottes de l'air cy dessus. [TABLE] Il y a encore plusieurs sortes de branles, desquelles je suis d'advis de vous en donner les tabulatures, puis que vous estes curieux d'en beaucoup sçavoir: Et fault que vous sçachiez que quand on a fait quelque branle nouveau, qu'ils appellent un ballet (pour s'en servir en une mascarade de quelque festin) incontinent les jeusnes gens l'apportent és compagnies, & luy attribuent un nom a leur plaisir. De ce nombre sont les branles dont s'ensuyvent les tabulatures, desquels branles & balets, la pluspart sont dancez avec mines, morgues, & gesticulations, & pour ceste occasion, on les peult appeller branles morguez: Nous les commencerons par le branle de Malte. BRANLE DE MALTE. Aulcuns Sieurs Chevaliers de Malte firent un ballet pour une mascarade en Cour, ou ils estoient aultant d'hommes que de Damoiselles habillez à la Turque, lesquels dançoient un branle en rond, qu'ils appellerent le branle de Malte, avec certains gestes & tornoyements des corps: Et depuis fut ce branle dancé par la France, comme nouveau, il y a environ quarante ans: L'air & les mouvements sont en mesure binaire, pesamment, comme verrez en ceste tabulature. CAPRIOL. Peult-estre qu'a Malte, les habitans du pays dancent ordinairement ce branle, & que ce n'est pas un ballet inventé a plaisir. ARBEAU. Je ne peulx croire que ce soit aultre chose qu'un ballet, car on le dance avec certaines morgues, gestes & contenances, que l'on y a observé pendant qu'il a esté en regne: Quoy qu'il en soit la tabulature suyvante vous servira. Tabulature du branle de Malte. [TABLE] Fault notter, qu'à toutes les fois que l'on fait repetition de ce branle, on fait aussi de nouvelles mines & gesticulations, come sont touchemens de mains, & à une aultresfois, eslevations d'icelles avec admiration la teste eslevee au ciel, & ainsi d'aultres morgues, telles qu'il plaist aux danceurs de rechanger. B. DES LAVANDIERES. Le branle morgué appellé, le branle des Lavandieres, se dance par mesure binaire, & est ainsi appellé, parce que les danceurs y font du bruit avec le tappement de leurs mains, lequel represente celuy que font les batoirs de celles qui lavent les buées sur la riviere de Seyne, à Paris. CAPRIOL. Faict-on plusieurs diversitez de morgues en ce branle des Lavandieres, duquel vous parlez? ARBEAU. Vous verrez par les annotations que je vous mectray en marge de la tabulature, les diversitez qui y sont, desquelles on ne fait point de rechange, quand on repete ledit branle comme au commencement, dont je vous eusse adverty quand bien vous ne me l'eussiez presentement demandé. Tabulature du branle des Lavandieres. [TABLE] BRANLE DES POIS. Entre les branles morguez & gesticulez, est celuy des Poiz, aultrement appellé le branle de Margueritotte, lequel se dance par mesure binaire legiere, comme le branle commun, ou comme le hault barrois, qui veult, il y entre aultant d'hommes que de femmes, qui le dancent ainsi que vous voyez en la tabulature suyvante, en la marge de laquelle, je vous ay mis les annotations des gestes & morgues qu'il y convient faire, lesquelles ne sont pas difficiles. Tabulature du branle appellé des Pois. [TABLE] S'ensuyt la tabulature de l'achevement de l'air & mouvements du present branle, appellé le branle des Pois. [TABLE] B. DES HERMITES. Je vous colloquerois entre les branles morguez, le branle des Hermites, lequel a esté ainsi nommé, parce que l'on y faict des gestes semblables à ceulx qu'ont accoustumé de faire les Hermites, quand ils saluent quelqu'un, & croy qu'aultresfois il soit yssu de quelque mascarade, en laquelle les jeusnes hommes s'estoient revestus d'habits taillez en forme de ceulx que les Hermites portent. Mais je ne vous conseilleray point de porter tels habits en masque, ny de contrefaire les contenances des Religieux, car il fault honorer & leurs habits & leurs personnes: Pour ceste occasion, je m'en tairay. CAPRIOL. Je suyvray voluntiers vostre conseil: Mais ne laissez de me donner la tabulature, comment on l'a dancé. ARBEAU. Je veulx bien satisfaire à vostre desir, puisque n'avez intention aultre, sinon de l'apprendre, pour n'en estre ignorant. Ce branle a esté dancé par mesure binaire mediocre, en la forme que voiez en la tabulature cy dessoubz. Tabulature du branle des Hermites. [TABLE] Le reste de l'air & des contenances, est cy aprés. [TABLE] B. DU CHANDELIER. Ce branle, aultrement appellé le branle de la torche, se dance par mesure binaire mediocre, ainsi & par mesmes pas que l'Allemande: Celuy qui le veult dancer, prend un chandelier avec la chandelle allumee, ou une torche ou flambeau, & en dançant & marchant en avant un tour ou deux par la salle, regardant çà & là celle qu'il veult mener, la choisit telle que bon luy semble, & dancent par ensemble quelque petit espace de temps. & en fin la colloque & laisse seulle au bout de la salle, & faisant la reverence, luy donne en main le chandelier, torche, ou flambeau, & en dançant se retire en sa place: La Damoiselle tenant le chandelier, faict comme elle a veu faire au jeune homme, & en dançant, en va choisir quelque aultre, auquel en fin, aprez l'avoir mis en sa place, elle donne le chandelier, & ainsi consequemment s'appellent a ceste dance les uns les aultres. Tabulature du branle de la torche. [TABLE] CAPRIOL. Ceste dance est propre a y faire entrer tous ceulx d'une compagnie, ainsi comme vous m'avez dit en la gaillarde Lyonnoise. ARBEAU. BRANLE DES SABOTS. Rosinus en son livre des antiquitez Romaines rapporte aprez Denis Halicarnassée livre 7. qu'entre les magnificences que l'on faisoit à Rome és pompes des jeux publicques, marchoient en leur renc les danceurs, avec les tibies, harpes & barbytons, l'un desquels danceurs marchoit devant les aultres, & leur monstroit certaines formules de dances & morgues, que tous les aultres qui le suyvoient, s'efforçoient de contrefaire aprez luy, comme s'ils eussent joué au guignolet: A ceste semblance fut faicte en ceste ville de Lengres une mascarade, en laquelle une mere-Folie precedoit trois fols, & leur prescrivoit certains gestes, puis se retornoit pour veoir si lesdits trois fols ses enfans, feroient bien comme elle: Ils dançoient le branle des sabots, qu'ils y avoient adapté. CAPRIOL. Comment se dance ce branle des sabots? ARBEAU. Par mesure binaire, comme les branles doubles, en faisant quatre pas a main gaulche, puis quatre pas a main droicte. Puis deux simples, & trois tappements de pieds que l'on repete. Tabulature du branle des sabots. [TABLE] En ce branle des sabots, les hommes feront (si on veult) les trois premiers tappements des pieds, & cependant les femmes ne feront aucun mouvement, & a la repetition, les femmes feront les aultres trois tappements de pied, & cependant les hommes ne se bougeront: Puis tous ensemble recommenceront le branle, pour y faire nouvelle morgue qui voudra. CAPRIOL. Ces tappements de pied me font souvenir des chevaulx quand il veuillent troubler l'eau, ou des haquenees, quand il leur tarde d'avoir le picotin d'aveine. ARBEAU. B. DES CHEVAULX. A ce propos, jay veu que l'on dançoit en ceste ville un branle, qu'on nommoit le branle des chevaulx, ou l'on faisoit des tappements de pied, comme au branle precedent, & me semble que l'air est tel ou semblable que voyez en la tabulature suyvante, laquelle se dançoit par mesure binaire, comme le branle commun, le jeune homme tenant sa Damoiselle par les deux mains. Le commencement de l'air dudit branle estoit comme voyez icy notté, & se dançoit par quatre doubles a gaulche, & par quatre doubles a droit. [PARTITION] Tabulature du reste de ce branle. [TABLE] B. DE LA MONTARDE. Aultresfois nous avons dancé un branle morgué, que l'on nommoit la montarde, qui se dançoit par mesure binaire, avec petits saults comme le hault-barrois, en allant tousjours a gaulche, sans divertir a la main droicte. Les danceurs sont en pareil nombre d'hommes & de femmes, un des hommes meyne le devant, une des femmes tient la queuhe, & dancent ensemble quatre doubles a gauche: quoy fait, le premier fait un tour en se separant des aultres: Puis la deuxieme fait un tour en s'approchant du premier: Puis le troisieme fait un tour en s'approchant de la deuxieme, & ainsi consequemment tous ceulx de la dance font chacun leur tour. Et quand la derniere à fait son tour, le premier fait une haye, en passant par devant les femmes, & par derrier les hommes, & se met a la queuhe prenant par la main la derniere femme: Et pendant qu'il fait ceste haye, les aultres (par devant & par derrier lesquels le premier est passé) se repreignent tous par les mains, & repetent le branle comme au commencement. Ainsi faisant, celle qui estoit la deuxieme, se treuve la premiere, & fault qu'elle face ainsi qu'à fait le premier au commencement, & ainsi chacun meyne le premier & le dernier a son tour: Et quand la derniere est venue a la primaulté, & qu'elle a fait la haye, elle se retreuve derniere comme elle estoit premierement: Lors les joueurs d'instruments finissent le branle, duquel voicy la tabulature. Tabulature du branle de la Montarde. [TABLE] CAPRIOL. Ce branle de la montarde, est donc celuy que les Damoiselles appellent la haye. ARBEAU. BRANLE DE LA HAYE. La dance de la haye que vous dictes est aultre: Elle se dance par mesure binaire, comme la Courante Les danceurs seuls, & l'un aprez l'aultre, premierement dancent l'air en façon de Courante, & sur la fin s'entrelacent, & font la haye les uns parmy les aultres: Je vous donneray en premier lieu l'air de ladicte Courante, lequel (comme sçavez) va par deux simples double, puis je donneray l'air que les joueurs d'instruments sonnent sur la fin, pendant lequel, les danceurs s'entrelacent. Tabulature de la dance de la haye. [PARTITION] Air & mouvements de la haye. [TABLE] CAPRIOL. Je ne peulx pas bien comprendre ce que dictes de ceste haye. ARBEAU. Vous l'entendrez bien facilement ainsi: Posez le cas qu'ils soient trois danceurs (cest le moindre nombre qui y peult estre) & ymaginez qu'ils soient comme voiez ces lettres A B C. A B C. És premiers quatre pas de l'air de la haye, A & B changent de place en passant a leurs gaulches, puis és quatre secondes mesures A & C changent de place, en passant a leurs mains droictes, tellement qu'ils se treuveront placez ainsi que voiez icy. B C A. Ce fait, B & C changeront comme dessus, puis B & A, tellement qu'ils se treuveront disposez ainsi que voiez és troisieme quatre pas de l'air de la haye. C A B. És quatre pas suyvants, C changera avec A, puis ledit C avec B, & ainsi se retreuveront comme au commencement. A B C. CAPRIOL. Si d'aventure les danceurs estoient plus de trois, l'entrelaz se feroit-il de mesme que venez de dire? ARBEAU. Vous le pouvez conclure. Mais il fauldroit avoir esgard a ce que je vous vay dire: Posez le cas qu'ils soient sept en nombre, a b c d e f g. quand a le premier aura changé avec b le second, & que ledit a aura encore changé avec c le troisieme, & qu'il viendra a changer avec d le quatrieme, il fauldra quant & quant que b maintenant premier, commence de hayer & changer avec c maintenant le second, & ainsi consequemment. CAPRIOL. A ce que vous dictes, j'ymagine que c soit le premier, & qu'il fauldra donc qu'il commence sa haye en changeant avec d, maintenant second, en mesme instant que b changera & fera la haye avec e, maintenant quatrieme, & ainsi consequemment. ARBEAU. Vous le prenez & entendez fort bien: Le branle de l'Official ne vous sera pas si difficile. B. DE L'OFFICIAL. N'a pas long temps que ce branle est en termes, lequel se dance par mesure binaire, & par petits saults, comme le hault-barrois, & se commence par un double a gaulche & un double a droit repetez. Puis les danceurs vont tousjours a gaulche six simples durant, a la fin desquels les joueurs d'instruments font la cadance, lors les hommes preignent les femmes par le faulx du corps, & les font saulter & bondir en l'air, pour tumber a ladicte cadance, & cependant les hommes se tiennent fermes sur les pieds pour les soustenir, & en ces endroicts sont bien empeschez ceulx qui se parforcent de souslever celles qui ne se veuillent ayder de leurs coustez. Tabulature du branle de l'Official. [TABLE] CAPRIOL. J'entends bien qu'il fault continuer ce branle, en repetant comme au commencement: Mais je le treuve de grand peine, joinct que pour le bien dancer, on depend en partie de la dexterité & allegresse de la Damoiselle qu'il fault que le danceur face saulter, & tel danceroit qui n'auroit pas force competente. ARBEAU. Vous ne treuveriez pas de grand peine les branles des Gavotes, esquelz il ne fault point enlever en l'air les Damoiselles, seullement il les fault baiser. CAPRIOL. Cest chose que je ferois aiseement & bien voluntiers, parquoy je desire les sçavoir & apprendre. ARBEAU. GAVOTES. Gavottes, cest un recueil & ramazun de plusieurs branles doubles que les joueurs ont choisy entre aultres, & en ont composé une suytte que vous pourrez sçavoir deulx & de voz compagnons, a laquelle suytte ils ont donné ce nom de Gavottes, lesquelles se dancent par mesure binaire, avec petits saults, en façon de hault barrois, & consistent de double a droit & de double a gaulche comme les branles communs: Mais les danceurs decouppent lesdits doubles tant a droit qu'à gaulche, par passages a plaisir tirez des gaillardes: Quand lesdits danceurs ont quelque peu dancé, l'un d'iceulx (avec sa Damoiselle) s'escarte a part, & fait quelques passages au meillieu de la dance au conspect de tous les aultres, puis il vient baiser toutes les aultres Damoiselles, & sa Damoiselle tous les jeusnes hommes, & puis se remettent en leur renc, ce fait, le second danceur en fait aultant, & consequemment tous les aultres: Aulcuns donnent ceste prerogative de baiser, seullement a celuy qui est le chef de la feste, & a celle qu'il mene: Et en fin ladicte Damoiselle ayant un chapelet ou bouquet, le presente a celuy des danceurs qui doibt payer les joueurs, & estre le chef de la feste a la prochaine assemblee, lequel y usera de mesme prerogative, & ainsi font par tour: Je vous donneray l'air du premier branle, & aulcuns decouppements que changerez a plaisir: Tabulature d'une Gavotte. [TABLE] Voicy le reste de l'air du premier branle de la suytte des Gavottes, que sonnent noz joueurs de Lengres: Vous y adapterez les decouppements cy dessus, ou tels aultres qu'il vous plaira choisir & inventer, ou imiter aprés les bons & gaillards danceurs: Si ceste espece de dance fust venue du temps de mes premieres jambes, je neusse pas failly d'en faire des memoires. [PARTITION] MORISQUES De mon jeusne aage, jay veu qu'és bonnes compagnies, aprez le soupper entroit en la salle, un garçonnet machuré & noircy, le front bandé d'un taffetats blanc ou jaulne, lequel avec des jambieres de sonnettes dançoit la dance des Morisques, & marchant du long de la salle, faisoit une sorte de passage, puis retrogradant, revenoit au lieu ou il avoit commencé, & faisoit un aultre passage nouveau, & ainsi continuant, faisoit divers passages bien aggreables aux assistans: Macrobe en son troisieme livre des Saturnales chap. 14. fait reciter par Horus, que les nobles enfans & jeusnes filles de bonnes maisons de Rome, dançoient avec Crotales, que Bade commentateur interprete sonnettes, mais ceste interpretation ne me plaist, & croirois plustost que Crotales fussent un petit tabourin de basque, garny de clochettes & sonnettes, tel que l'on faisoit porter a la mere des Dieux, ou bien que ce fussent ce que nous appellons cymbales & fer triangulaire, garny de boucles, dont aulcuns jouent & font un bruict aggreable pour accompagner la vielle: Quoy qu'il en soit, ils tenoient a grand louange d'y sçavoir bien dancer. CAPRIOL. Ce vers de Virgile sert pour vostre opinion. Crispum sub Crotalo docta mouere latus. Si le Poëte eust entendu des sonnettes, il eust mis Cum, & non pas sub : Tandis je vous prie m'en donner quelque peu de tabulature, & je les apprendray adancer a mon laquais. ARBEAU. Les Morisques se dancent par mesure binaire: Du commencement on y alloit par tappements de pieds, & par ce que les danceurs les treuvoient trop penibles, il y ont mis des tappements des talons seullement, en tenant les arteils des pieds fermes: Aulcuns les ont voulu dancer avec des marque-pieds, & marque-talons meslez ensemble: Lexercice de toutes les trois sortes, signamment celle qui va par tappements de pieds, a fait cognoistre par experience, que finablement on y engendre la podagre & maladies des gouttes, parquoy ceste dance est tumbee en dessuetude: Je ne laisseray de vous en donner l'air, avec les mouvements d'un passage, & quand aux aultres passages, vous les pourrez apprendre de ceulx qui y sont stilez, desquels pour le jourd'huy s'en treuve bien petit nombre. Tabulature des Morisques. [TABLE] CAPRIOL. Ainsi que me deduisez les mouvements de ceste Morisque, il semble que le danceur ne bougera d'une place. ARBEAU. Il fault bien qu'il marche tousjours avant, jusques au bout de la salle: Et pour ce faire, notterez qu'aprez le frappe talons qui equipole a pieds joincts & cadance, avant le frappe-talon droit, le danceur avance legerement ses deux pieds, & en mesme instant, fait ledit frappe talon droit: Car si vous considerez bien, aprez les pieds joincts, le frappe talon droit suyt. Notterez aussi, que cest air de Morisques se decouppe par crochues, & a chacune d'icelles, fault des frappe talons comme dessus. [PARTITION] CAPRIOL. Monsieur Arbeau, je me suis prins garde qu'en toutes les dances desquelles avez deonné les mouvements, vous n'avez point parlé du Ru de vache, & neantmoins vous me l'avez figuré par cy devant entre les aultres mouvements. ARBEAU. Vous dictes vray: Mais la raison est, parce que les danceurs n'en usent quasi point, si ce n'est en la dance des Canaries, de laquelle je voulois entrer en propos. CANARIES Aulcuns dient qu'és Isles des Canaries on use de ceste dance, & qu'elle leur est ordinaire: Aultres, de l'opinion desquels jaymerois mieux estre, soustiennent qu'elle a pris source d'un ballet composé pour une mascarade, ou les danceurs estoient habillez en Roys & Roynes de Mauritanie, ou bien en forme de Sauvages, avec plumaches teintes de diverses couleurs. La façon de dancer les Canaries est telle: Un jeune homme prend une Damoiselle, & danceans ensemble soubz les cadances de l'air qui y est propre, la mene sister au bout de la salle: Ce fait il se recule ou il a commencé, regardant tousjours sa Damoiselle, puis il va la retreuver, en faisant certains passages, quoy fait, il recule comme dessus: Lors la Damoiselle en vient faire aultant devant luy, & aprez se recule en la place ou elle estoit, & continuent tous deux ces allees & reculements, tant que la diversité des passages leur en administre les moyens, notterez que lesdits passages sont gaillards, & neantmoins estranges, bizares, & qui resentent fort le sauvage: Vous les apprendrez de ceulx qui les sçavent, & en pourrez inventer vous mesmes de nouveaulx, seulement je vous donneray l'air de ceste dance, & aulcuns mouvements des passages qu'ont accoustumé de faire les danceurs, a veoir lesquels les spectateurs preignent plaisir. Tabulature de la dance des Canaries. [TABLE] CAPRIOL. Vous m'avez cy devant promis la pavane d'Espagne aprez les Canaries: Comment la fault-il dancer? PAVANE D'ESPAGNE. La pavane d'Espagne se dance par mesure binaire mediocre, soubz l'air, & avec les mouvements, dont s'ensuyt la tabulature, & quand on l'a dancee en marchant en avant pour le premier passage, il la fault retrograder en desmarchant, puis continuant le mesme air, on fait avec aultres nouveaulx mouvements le second passage, puis les aultres consequemment, lesquels pourrez apprendre tout a loisir Air et mouvements de la pavane d'Espagne. [TABLE] Il me semble (Capriol mon bon amy) vous avoir satisfaict, en vous donnant ce que j'ay peu me resouvenir, tant de la saltation & dance guerriere, que de la recreative: N'est ce pas suffisamment, attendu qu'il y a si long temps que je n'en n'ay fait exercice, & que la pluspart des dances sont nouvelles. CAPRIOL. Je ne pense pas (monsieur Arbeau) qu'il soit possible d'en traicter d'avantage ny plus lucidement: Vray est qu'avez encore oublié a parler des Bouffons. ARBEAU. Vrayement puisque vous m'en advisez, je vous diray ce que j'en ay peu apprendre. LES BOUFFONS Les Saliens ou danceurs instituez par le Roy Numa en nombre de douze, pour celebrer les festes sacrees a Mars, estans vestus de robes peintes, avec riches bauldriers & bonnets aguz, les braquemards aux coustéz, les petites baguettes en la main droicte, & en la main gaulche les boucliers (desquels l'un estoit comme on disoit descendu du Ciel) dançoient au son des tibies, & faisoient gesticulations militaires, tantost les uns aprez les aultres, tantost ensembleement. CAPRIOL. Ceste dance, n'estoit ce pas la dance armee appellee Pirrique, que Minerve dança de joye aprez les Titanes vaincuz? ARBEAU. La fable dit que les Curetes inventerent ceste Pirrique pour amuser le petit enfant Juppiter, a leurs gesticulations, & au bruit qu'ils faisoient de leurs espees heurtees contre les boucliers: De ces deux sortes de dances, on en a composé une que nous appellons les Bouffons ou Mattachins, qui sont vestus de petits corcelets, avec fimbries és espaules, & soubs la ceinture, une pente de taffetats soubz icelles, le morion de papier doré, les bras nuds, les sonnettes aux jambes, l'espee au poing droit, le bouclier au poing gaulche: Lesquels dancent soubz un air a ce propre, & par mesure binaire, avec battements de leurs espees & boucliers: Pour comprendre ceste dance, fault presupposer qu'on y fait plusieurs sortes de gestes: L'un des gestes est appellé feincte, quand le danceur saulte sur ses pieds joincts, tenant son espee sans en toucher aucunement: Laultre geste est appellé estocade, quand le danceur recule son bras, & avance la poincte de son espee, pour frapper d'icelle son compagnon. L'aultre geste est appelle taille haulte, quand le danceur frappe son compagnon en descendant & fauchant de la main droicte (de laquelle il tient son espee) a la main senestre: Laultre geste est appellé revers hault, quand au contraire le danceur frappe son compagnon, en fauchant & descendant dés sa main senestre a sa main droicte: L'aultre geste est appellé taille basse, quand le danceur frappe son compagnon, en montant de la main droicte a la senestre: L'aultre geste est nommé revers bas, quand le danceur frappe son compagnon, en montant de la main senestre a la droicte: Et a fin que vous entendiez mieux la tabulature que je vous en veulx donner, je n'espargneray pas de vous figurer lesdictes sortes de gestes. Feincte. [IMAGE] Estocade. [IMAGE] Taille haulte. [IMAGE] Revers hault. [IMAGE] Vous voyez cy dessus quatre figures des gestes dont je vous ay parlé, sçavoir la feincte, l'estocade, taille haulte, & revers hault, restent les figures des deux aultres gestes, que vous voyez icy dessoubz, oultre lesquels il y a encore quelques mouvements de corps qu'il me semble suffiront de vous estre donnez par escrit, sans qu'il soit besoin de figures. Taille basse. [IMAGE] Revers bas. [IMAGE] CAPRIOL. L'escrime m'avoit desja appris tous ces gestes: Dictes moy maintenant comment on dance les Bouffons. ARBEAU. Presupposez que quatre personnes, soient Soldats ou Amazones, ou deux d'un & deulx d'aultre, sont a l'entree de la salle, A. B. C. D. bien proprement habillez. CAPRIOL. Je les ymagine comme vous dictes, que feront-ils? ARBEAU. Premierement A. entrera seul, & en maniant son espee a mesures, fera une ronde par la salle, & se viendra presenter a l'entree, mettant la poincte de son espee contre le plancher, comme s'il vouloit appeller au combat ses compagnons: Ce fait il recommencera une ronde, & B. le suyvra, a la fin de la ronde, appellera ses compagnons: Lors A. B. recommenceront une ronde, & C. les suyvra, lequel fera comme les deux aultres auront faict: Puis tous trois feront une ronde, & D. qui est le quatrieme les suyvra: Et quand ceste quatrieme ronde sera finie, & qu'il ny aura plus personne a entrer, ils feront une ronde tout au contraire de la premiere, & a la cadance de ceste ronde renversee, ils se treuveront plantez en escadron pour commencer les passages de leurs batteries, & se treuveront ainsi, car ils ont premierement fait leur ronde, le pied gaulche en dehors. [TABLE] L'air des Bouffons est notoire a un chacun: Le voicy notté entierement jusques a sa cadance, & les joueurs le repetent tousjours, tant en faisant les rondes que les passages. Air des Bouffons. [PARTITION] CAPRIOL. Quels mouvements feront ces quatre ainsi campez? ARBEAU. Il vous fault encore sçavoir, que tout ainsi que les joueurs d'instruments continuent de sonner jusques a la fin l'air cy dessus, aussi les quatre danceurs continuent de dancer les mesmes mouvements, soit en cheminant quand ils font les rondes, soit en s'arrestant quand ils font leurs batteries. CAPRIOL. Les mouvements sont-ils fascheux a faire? ARBEAU. Vous les treuverez tres faciles, comme il appert en la tabulature cy dessoubz, qui se dance par mesure binaire legiere. [TABLE] Vous avez les pas & mouvements des Bouffons, apprenez maintenant les gestes que l'on y fait és passages des batteries, lesquelles il fauldra faire immediatement aprez les rondes, & vous souviendrez qu'à la fin d'un passage, il fault faire une ronde le pied gaulche en dehors, puis la renverser & retrograder ledit pied gaulche en dedans, avant que commencer le passage qui doit suyvre, chose qui sert beaucoup aux quatre danceurs, car pendant qu'ils font la ronde, & qu'ils l'a retornent, ils meditent au passage qu'ils ont a faire, & se remettent en cervelle. Ainsi que les danceurs A. B. C. D. sont disposez, A. est viz a viz de D. & battra contre ledit D. & par fois contre B. qui est a sa droicte. Et au semblable C. se treuvera viz a viz de B. & battra contre ledit B. & par fois contre D. Et notterez que les mesmes gestes que fait A. ces mesmes doit faire C. & par ainsi la tabulature propre au danceur A. servira pour le danceur C. comme voiez icy dessoubz. [TABLE] Aprez que A. & D. ont changé de place, & que C. & B. ont aussi changé de place en mesme instant, les quatre danceurs se treuveront ainsi disposez. [TABLE] A. battra maintenant contre B. & par fois contre D. & C. battra contre D. & par fois contre B. & feront les mesmes gestes & batteries que cy dessus, & quand ils auront changé de place, ils se treuveront campez ainsi: [TABLE] A. fera les gestes que nous avons dit au commencement, contre D. & par fois contre B. comme aussi fera C. contre B. & quand ils auront changé de place, ils se treuveront ainsi posez. [TABLE] A. battra contre B. & par fois contre D., comme aussi C. contre D. & par fois contre B. & quand ils auront changé de place, les danceurs se treuveront ainsi posez. [TABLE] Vous voyez que les quatre danceurs sont posez comme ils estoient au commencement, parquoy leur premier passage est accomply, & doibvent sans intermission, faire leur ronde & retour d'icelle pour commencer le second passage, que l'on appelle passage des trois coups. CAPRIOL. Je ferois bien les gestes de A. & de C. mais vous ne m'avez point dit quelz gestes doibvent tenir D. & B. ARBEAU. Les mesmes que A. & C. & ny a difference, sinon que quand A. & C. font trois quarts de tour en dehors a la gaulche, D. & B. doibvent faire seullement un quart de tour a la droicte, & quand A. & C. font un tour en dehors a la gaulche, D. & B. doibvent faire ledit tour a la droicte: Les aultres passages vous les apprendrez tout a loisir. CAPRIOL. Je ne treuveray guieres de maistres ny de compagnons qui m'enseignent les aultres passages, comme ils pourront faire les aultres branles, parquoy je vous prie les m'apprendre, car j'espere quelque jour en faire une jolie mascarade, pour donner plaisir a ma maistresse. ARBEAU. Je le veulx bien: Supposez donc que les quatre danceurs sont disposez (aprez leur ronde) comme au commencement, ils feront le passage suyvant, que l'on appelle les trois coups. Passage des trois coups. A. battra contre D. & C. battra contre B. [TABLE] Passage des quinze coups. [TABLE] Passage de l'estocade. [TABLE] Passage du Bastion. [TABLE] Aprez l'air de ceste cadance reppeté quatre fois, les quatre danceurs se treuvent disposez comme au commencement: Lors sans intermission, ils font leurs rondes, comme cy devant a esté dit, pour se preparer au sixieme passage. Passage de la haye. [TABLE] Fault maintenant renverser la haye, parquoy a donnera contre B. & C. contre D. pour la deuxieme cadance, puis repeteront comme au paravant ladicte haye & son revers, pour la troisieme & quatrieme cadances, & le tout fait, se retreuveront disposez comme au commencement puis se retireront. CAPRIOL. Monsieur Arbeau, je vous mercie de la peine qu'avez prise a m'enseigner la dance. ARBEAU. Je desirerois avoir peü egaller l'effect a ma bonne affection, que prendrez de bonne part, attendant que je vous recite les airs & mouvements de plusieurs balletz de mascarades faictes en ceste ville, dont nous traicterions en une seconde partie a nostre premier loysir: Ce pendant practiquez les dances honnestement, & vous rendez compagnon des planettes qui dancent naturellement, & de ces Nymphes que M. Varron dit avoir veu en Lydie sortir d'un estang au son des fluttes, dancer, puis rentrer deans leur estang, & quand vous aurez dancé avec vostre maistresse, rentrez dedans le grand estang de vostre estude, pour y proffiter, comme je prie Dieu vous en donner la grace, [IMAGE] Extraict du Privilege. IL est permis à Jehan des Preyz Imprimeur demeurant à Lengres, d'imprimer ou faire imprimer un livre intitulé l'Orchesographie, estant soubz le nom de Thoinot Arbeau, durant six ans, avec deffences à tous Imprimeurs & Libraires d'imprimer ne faire imprimer ledit livre durant ledit temps de six ans, sur peine de confiscation desdits livres, d'amende arbitraire, & de tous despens dommages & interestz, comme plus amplement est contenu en ses lettres de Privilege donné à Bloys le 22. Novembre 1588. signé par le Roy en son Conseil B V Y E R. seellé en cire jaulne, du grand scel de sa Majesté.